“Omandjandja gandje ohaga lala taga lili kondjala, omanga aakwanambwiyu taya yama  komagundji.”

Ndhoka odha popiwa kuLucia Micheal gwomomukunda Oshali moshitopolwa shaHangwena, ta indile ekwatho moshigwana opo a yambidhidhwe niikulya oshowo iilonga yokoonyala, opo a vule oku eta omboloto poshitaafula.

Ta ti okwali a pula nale ekwatho moshigwana ihe ina mona esilohenda.

“Onkalo ndi li muyo ondhigu, otandi mono iihuna. Aakwanambwiyu   otaya gwanitha omvula, ihe natango otandi ya yamutha komagundji oshoka kandi na sho tandi ya pe, ngele nde ya kutha ko,” ta ti ngaaka.

Ta hokolola ta ti, okwa kala nokukambadhala, okukonga iilonga yokoonyala mbyoka e na ontseyo muyo, ihe ina mono oshoka anuwa kape na ngoka a hala omuniilonga e na
uunona.

“Otandi indile moshigwana kukehe ngoka ta vulu okukwathela ndje niikulya nenge niilonga opo ndi mone oshimaliwa, ndi vule okulanda iikulya yetu nuunona yandje,” ta indile.

Micheal okwa ti, sho ali a mono onkalo tayi ende yu uka kuuwinayi, okwa li a kutha onkatu sigo okukansela gwoshikandjohogololo shawo, a ka pule nkene e na okuyambidhidhwa, ihe anuwa okwa yamukulwa kutya kaku na iikulya manga.

“Natango okwa li nda thiki poombelewa dhuuministeli wuukakwashike kookantu nuuthemba womuntu, ihe okwa li nda yamukulwa kutya itaya kwathele uunona wuli moluhepo, ihe otaya kwathele ashike mboka ye na uulema nenge oothigwa.

Ta ti, onkalo e li muyo ondhigu noonkondo, oshoka iha lala akotha  omolwondjala yomepunda. 

Micheal okwa lombwele Kundana ta ti, he youunona ye okwa li ha yambidhidha naashoka e na po, ihe paife okwa
kanitha iilonga, omolwomukithi
ngoka gwa ponokele moshilongo gwoCovid-19.

“Itandi indile ashike shoka nda zi nokutumbula, ihe otaka taamba kehe shoka tashi vulu okuyambidhidha ndje opo ndi mone sha shokulya oshowo okuyambidhidha uunona,” ta popi ngaaka.

Ta ti, okwa hala okuhulitha po okuyamitha ihe ita vulu oshoka ke na shoka ta pe uunona.

Ta ti, natango shoka otashi mana po olutu lwe oshoka itali iikulya yi na uundjolowele.

“Onda thikama nena mpaka kesilohenda lyaKalunga, oshoka ngele esiku ndyoka inandi pewa sha shokulya kaashiinda, nena ohandi hupile momeya gwokopomba,” ta hokolola ngaaka.

Ngoka ena ehalo lyoku muyambidhidha nadhenge konomola 081 280 5866