New Era Newspaper

MTC Shares
Icon Collap
...
Home / Zambezi imangana ni butuku bwataku ni mulomo

Zambezi imangana ni butuku bwataku ni mulomo

2021-08-02  Albertina Nakale

Zambezi imangana ni butuku bwataku ni mulomo
Top of a Page

Mutayi obona zamipendo yalimunanu kutisa cwale use upendile likomu zelikana 70 354, hala zelikana 75 000 zelelezwi kusilelezwa kwabutuku bwataku ni mulomo, bobunze buambalakana kakuankufa mwasikiliti saZambezi. Butuku nebukile bwaswaliwa lapilli la 27 Kandao, mi bwanyatelwa mwalabalatoli la 3 Mbuwana, kwamunzi waKasenu mwasilalanda saKabbe yaMbowela. Kutisa cwale butuku buyandulukezi kwaminzi yecwale ka Luhonono, Namiyundu, Nakabolelwa, Muzii, Ikaba, Kalala, Nankuntwe, Nfooma ni Nakabolelwa. Muyemeli wasilalanda saKabbe yaMbowela John Likando nabilaezi kuli butuku bukataza hahulu mwalibaka zamabala amuunda ili Muzii, Nankuntwe, Nantungu, Itomba ni Kalala.

“Balimi balatehelwa kilikomu kazazi. Ofesi yasilalanda inze iamuhela lipiho zeñata zakubata tuso. Butata bobutuna kikuya teñi. Kanako yacwale kikakusebelisa feela polopela kapa lonji, ili yeo bababona zamipendo habana. Kabuna kusebeliswe lipolopela kuisa likwata mwalibaka zetaselizwe hahulu, kufukuza kuambalakana kwabutuku,” nekubulezi Likando. Likando ubilaela kuli haiba butuku inge buzwelapili, kampani yaMeatco ikaswana yatalimana ni butata bobuswana bone butisize kuli ikwale kasilimo sa2015. Mwangambolo muzamaisi mwaofesi yebona zamipendo yalimunanu Dr Albertina Shilongo, naize mupendo wakusileleza likomu kiomuñata.

Naize hakuna lipiho zamafu alikomu zeamuhezwi kiofesi yahae kasamulaho akuzuha kwabutuku. “Butuku bwataku ni mulomo habubulayi hahulu limunanu zehulile, kono bubulaya hahulu limunanu zesafokola, bakeñisa kululuhisa misinga yapilu. Kakokwani kataku ni mulomo hape katisa kukubuha kokusiya litombo falulimi, mwahanu ni mwahala litaku, ili taba yetisa butuku bobutuna, kusaca ni kufukuzeha kwamuzilili,” nekutolokile Shilongo. Nabulezi kuli butata bobatalimana ni bona kikuli habakoni kufita kwalibaka zeñwi zetaselizwe, nikuli fokuñwi batu bazamaisa nama busihu, kakuli miseco haiezahali busihu, ni balimi babasaisi likomu kaufela kwamupendo. Kikafo nasusuelize balimi kuisa likomu kaufela kwakupendiwa.


2021-08-02  Albertina Nakale

Share on social media
Bottom of a page