Kahiriri wa  meṱameṱa  pamwe nosikore aihe ya Kaepe

Home Languages Kahiriri wa  meṱameṱa  pamwe nosikore aihe ya Kaepe
Kahiriri wa   meṱameṱa  pamwe nosikore aihe ya Kaepe

Eye u tjiukwa otjomundu ngu hi nenyando nandarire momurungu we kamu yatere omameṱameṱero.

Posi ya tji ya ri 10 komueze mbwi omurungu we wa ri eharwi romameṱameṱero kovengi otjo tji tja ri otjikando otjitenga okumumuna ama yorayora. Mena rokutja wa ri umwe wovahongwa mombembera ya Kaondeka yomahongero mOkarukondwa kOmatoororero ka Kakarara eyuva rotjirarakaneno tjomambo kutja ye tjangwa vi ngwa seninine norutuu routoṋi. 

Osikore ya Kaepe yoprojeka ya sekirisire otjirarakaneno tjomambo wOtjiingirisa kutja ye tjangwa vi, ovahongwa avehe kumwe 50 mu va karere norupa. Nu Uasuta Kahiriri, omuhongwa wondondo oitja-7 pOkaepe a ha ṱisa osikore ye ohoṋi na toora otjikorone tjondondo indji oitjahambombari.  Ombura ndja zu ko oma ri motjirarakaneno posi ya a ha toṋa. Otjikando hi e rihungirire. Ma tja: “Otjirarakaneno katja ri nomambo omazeu pu pe ṱa pi nu tjingetjo wina katja ri nomambo omapupu. Embo rimwe nda harere okumuzunga ra ri “converse”. Kahiriri ke nokuzemba ko omiṱiri ye yOtjiingirisa Yvone Tuaandi-Mujazu ngu va kawondjere pamwe nokuhina okuurwa mokumurongerisa. Ma tja: “Ondjira indji ndja tanda ke nokutjiwa kutja ma tjaerwa i ye. Na tja otjitjitwa hi otjinahepero tjinene okuhonga ovahongwa Otjiingirisa. Ombura ndji mai yende akuhe ku ma kahita, ouye ngau tjiwe kutja eye omutjinde wotjikorone. Ovahongwa vozosikore hamboumwe morumbembera ndwi omba karere norupa. Oruveze orutenga rwa ire kovahongwa imba:  Ondondo 9- Mbeuka Upingasana (Osikore ya Okamatapati Ohovekwa); Ondondo 8- Jacobine Katjiteo (Osikore ya Kondjaṱu Ohovekwa); Ondondo 7-Uasuta Kahiriri (Osikore ya Okaepe Oini); Ondondo 6- Kutaara Muinjo (Osikore ya Okakarara yOmautiro); Ondondo 5- Haily Kazenaimue (Osikore ya Kakarara yOmautiro); Ondondo 4- Kahimise Ngatamunue (Osikore ya Kamatapati Ohovekwa).