NDUNO – !Nōsa tsî sâsa ǀhûhâsib Kavangob Huriǂoas di Nduno !garo!ās din ge !napetamase go hâ !hau!hausa tsî tsûsa ǁōb 74 kurixa Thomas Kandandub dib xa ra !oa. ǁÎb ge ǂoa ge wekheb di Wunstaxtsēkam ­ǁgoaga ǂkhoab xa ge !gamhe.

Nē !nae!khais ge ǁaupexa Wunstaxtsēkam !nauǁgoagas di 04h00 ǁaeb ai ge ī, Kandandub tsî taras hâra ge !hanab ǁga garu i tsēs sîsengu ǀkha sī ǁnāǂgōs !aroma ǁaeb !nâ. ǀAwa!namn !nurib ra mîsa !oa ra ge nē khoe-omgura ǀguipa ge garu I, ǁnāpab ge Kandanduba tarasa xu 1haerose gora tsî ǀgūse mâ haidi !nâ a ǂgâse. Taras âb ge !gû!kharus ǀguisa !hanab ­ga ge ī, !âubasens gereseb ­ǁîba nî sao!kharu sise. ǁAe-i khao!gâb ge ­ǁîba !hanab tawa noxopa sī tama ipas ge ôas ge tsoatsoasa.

“ǁŌǂoa geb di taras ge ǁanǂgāsabena nē !nae!khais ǂnamipe ge ǂanǂan, ǁîn ge ǀhû­ǁarebese !kharaga !âgu !nâ ôas ǀkha a tsoatsoase. ǁîn ge nē aob ǁōâ sī ge hōǁgoe. ǁîb ge ǁgoe i !khaib ai hâ ǁgauǁgaun, aiǁgause kai ǂaigu ǁ­îb soros ǂnamipe ge hâ i gu ge ge ǁgau, Kandandub ge ǂkhoa-i ǀkha !gû­ǁareas, ǁîba ge sauru tsî ǂgui !nāde a dā!gâ-e,” tis ge Kavangob Huriǂoas ǀawa!namn mûǂam ra komesares, Julia Sakuwa-Neosa ge mî. Sakuwa-Neos noxopa ai!â ge mîs ge, nē ge ǁōǂoab kaise ǁnā !garo!ās tsî ǂnamipeb !nâ ge ǂanǂansa i !khaisa. ǀAokhoen âb tsî ǂhanusise nē !nae!khais ǂnamipe ge ǂanǂanhe.

Nē go i !nae!khais ge nē ǀkharib !nâ ra ai!gû tsî ǀgapi !gôaga sī!nâ ǂkhôab, hîa khoen tsî !aubǀgurun ǁaegu hâba ra ǀgonǀgon!gao. Nēpa hâ !khais ge ǂgari-aon, ǁanǂgāsaben tsî !aubǀgurun tsîn hoan ra hâ a !aub !nâ ûixūxūn tsî ǂnamipeba !khōgu !khaisa. ǁAnǂgāsaben ge ǂganhe tsî ra !nape!nape!nâhe, hoaǁae ǁkhowa-amsa mûra tsî ǂgaera tsîn ǀkha ǂkhaigari hâsa, !gōsase ǁgoa!aromadi tsî !ui-adi hîan ǂkhoana kaise ûisase ra hâma ǁ­aegu !nâ.Noxopan ra ǂganhes ge, ǂkhoanan nî mû ­aegu !nâ ministeris ǂnamipeb dis tamas ka i o ǀawa!namn tawa !nurisa.