OSHAKATI – Deuas Shipweisho Armando a shivika nawa Kalunga oku li dingi mokuhondja oikutu yomaludi a yooloka komatala kOshakati. 

Omulumenhu ou okwa hokolola ta ti okwa tameka okuhondja momudo 2018, omo kwa li ha hondjele meumbo. 

“Kakwa li ndi na eshina, okwa li ashike handi hondjo neenyala dihe na eshina,” ta ti. 

Okwa weda po ta ti omudo 2019 okwa landelwa eshina lokuhondja kuxekulu. 

Okwa yelifa ta ti omudo 2021 fiyo 2023 okwa ya koshilongo shoDRC omo kwa li e li omunailonga ta longo moshihondjelo. 

“Onda mona ko ounongo wa wana fiyo handi alukile moshilongo momudo 2024,” ta ti. 

Okwa ti okudja opo okwa ya momatala aaShakati opo a kale e na mo oshihondjelo shaye. 

“Ina ndi ya kofikola yokuhondja ashike onda mona ounongo uuhapu pefimbo nda li kondje yoshilongo handi longo moshihondjelo,” ta ti. 

“Okuhondja oshipewa shange shaashi okudja peedula dishona onda putuka ndi hole okuhondja oikutu,” ta ti. 

Kalunga okwa ti okuudite etumba eshi ta longifa ounongo waye okuhondja oikutu. 

Okwa hokolola ta ti ngeenge owai momatala a Shakati oye ashike dingi mokuhondja oikutu shaashi a yandje omayakulo mawa koshiwana. 

“Oto hange ovanhu vahapu ve li momukweyo va eta oikutu yavo koshihondjelo shange. Oshiwana oshihole okueta oikutu yavo kuame shaashi ova panda oilonga yange,” ta ti. 

Kalunga okwa ti okwa kuta omulumenhu weedula 31, hava hondjo naye. 

“Onde mu linekela shaashi ngeenge nda dja po oha dulu okuyakula nawa oshiwana. Okushi oilonga nokuna oukumwe,” ta ti. 

Stephanus Tomas ou e li omunailonga okwa ti okwa pandula eshi a mona omhito yoilonga shaashi paife ota dulu okuyambidida ounona vaye. 

Okwa ti okwa pandula muni waShakati eshi a tungila oshiwana omatala shaashi paife ove na omhito yokulonga oyuuyemo yavo. 

Okwa kumaida ovanyasha vakwao opo va longife ounongo okulilongela oyuuyemo yavo. 

“Ovanyashapaifeoveliashikemomaumbo vehe na eshi tava ningi osho shi li shapuka molwashi opena omikalo dihapu tava dulu okulonga oshimaliwa shavo,” ta ti. 

-fhamalwa@nepc.com.na