ONGWEDIVA – Kansela waShakati West Ndilimeke Iileka okwa ti ye melelo laye okwa hala a kume koshikumungu shondjala, omalukalwa osho yo okukwafa oshiwana momikalo keshe tadulu.

Iileka edi okwe di popya pefimbo leenghuundafana davo naKundana kutya moshikandjohoololo omu na omaupyakdi oo a kala taa dana onghandangala efimbo lile, novanhu ova kala noku atalaalela efimbo lile.

“Oilonga yange natango ohandi ke i wanifa po yo she likolelela komafeneko oSwapo,” ta ti.

Okwa twikila kutya ngeenge tashi ya pomaudaneko aye okudenga ondjala, oku na ediladilo ngeno lokutula ounamapya moilonga, opo ashike ovanhu va dule okukala kuvo vene.

Poshitaafula shaye vati oku na po omakemo ahapu a dilila moshiwana, ashike vati okwa hangika nale e li metifa lokukwafa apa ta dulu okudililila molopyeka oyo hai ufanwa 2026–2029 Medium Term Expenditure Framework.

Iileka natango okwa ti ngeenge tashiya pomulukalwa, ovahala ovakalimo va pewe omaumbo kondado tai dulu okulidininikilwa.

-taimihaihambo2000@gmail.com