Kavangob Aiǂoas ǀkharisi mûǂamaob, Hamunyera Hambyukab ge ǀgūǁae ǁîb di ǀawema!nans khoen ǀkha Omaheke ǀkhariba ge sari hâ i, ǁnāpan gomaǂgarib hîa dai-i tsî dai-e xu ra kuruhe xūn ai ǂâisa ǂnûihâb !garo!ādi tsî !hanaǂgāb !aroma. !Uru ǁgūbas ǁîn saris dis ge, ǀkharisi ǂande ǀgoragus tsî !gâise ra sîsen dīǀgaun tsî ǁgoaǂuidi ǂnamipe ǀawemāgus ai ge hâ i. 

Omahekeb !nân ge Hambyukab tsî ǁîb khoena, Omahekeb di ǀkharisi mûǂamaob, Pijoo Nganateb hîa ge nē saris Travena Gomaǂgarib disa, !Garo!ās du Plessis ǁga !khōdana hâ ib xa ǁkhoreǁharehe. Nēs ge ǀkharib !nâs ǁîsa hoan xa a kai gomaǂgarib !garo!āsa. 

Hambyukab hîa aiǂnû-aob, Kavangob Aiǂoas ǀKharisi ǀAwema!nans dib, Stefanus Sinongeb tsî Laurentius Mukoyab, ǂgiǂgosi ǀawemā-aob Ndiyona ǁhûi!nâǂharis dib xa ge ǁnūhe hâ i. Nē saris !nâ gu ge !hanaǂgāb projekdi hîa !Garo!ās Nuwehoops, ǂKhoandawes !augab ǀnomammi ai ǁgoes tsîn tawa ge sī hâ i. 

Travena Gomaǂgarib !Garo!ās du Plessis di ǂnuwi-aob, Frans Murangib ǀkhan ge nē sari-aona !gâi tsî ǂûǂûxa ǁgamǁarede ge ūhâ i, ǂâisan !gâise ra sîsen dīǀgaugu, mâpan ra ǁamaxūs tsî ǀkharib !nâs tsî !ā!nāsise hâ ǂkhâ!nâdi tsî omkhâis ǂnamipe ge ǂnûi hâ ise. 

“Sida ǁgamǁaredi ge ǀnai hâ gomaǂgarib tsî daiba xu ǀamas di sîsenǂuigu hîa da sida ǀkharib !nâ hâ Uvungu-vhungu gomaǂgarib projeks !nâ a huisenū ǁkhāna xu domdores ai gere ǂâi-aiǂnûi, Kavangob Aiǂoas !nâ da !hū-omkhâis tsî !hanaǂgāba mâti a ǀgaiǀgai ǁkhā tsî ǂûn ǁawosasiba a ǁawoǁawo ǁkhāsa,” tib ge Hambyukaba ge mî. 

ǁÎb ge !kharaga !âǀhuru-aon ǀkhas tsîna ǁgamǁaredi !nâ ge hâ i, sîsenǁarega ǂnuwis tsî taniǀgarehe ǁkhā sîsenǀgauga !amǂgās ase. 

Hambyukan di saris, Omahekeb ǁgas ge ǁîb ǁnaetisase ǀnai !goaxa-ū dītsâdi, !hū-omkhâisa ǁîb ǀkharib !nâ ǂgurose aimâis !aroma !gâi tsî sîsenxa dīǀgauga hōs tsî ǁnās xa huihe hâse ǂûn ǀorosiba oe-am tsî ǀhûhâsigu ûiga ǂgarib !nâ-ū omkhâis ai !gao!gaosa. 

ǂOa ge kuriba xun ge 3 400 xa a !nāsa ǂgari-aon, Kavangob Aiǂoas !nâ hâna, ǂhanub Dry Land Crop Production Proxramme and Cereal Value Chain ti a ǂansab !naka huiba ge !khō!oa. 

Ai!ân ge 3 403 ǂgari-aona !khomna ge !khō!oa tsî 1 044 ǂgari-aon hîa ǀhûǁare hâse 2 656 hektar!hūs ai a ǁaxana, !kharaga huisenxūn hîan !hanaǂgāb !nâ a sîsenū ǁkhāna a !khō!oa hîa. 

Uvhungu-vhungus !hanaǂgāb ge noxopa !gâise ai!gûgaru, 147 hektargu milinan !hanahâ hîa ǁkhaisa tonga mâ hektari hoaba xu ra !orase. 

Nau ǀkhāb aib ge Ndonga Linena !hanaǂgās projeksa 88 hektargu milin tsî 22 hektargu !horoba ge ǂgā, hîa ǀhaob ai 440 tongu ǂûna ra māse.