Xoa-aob: George Sanzillab
KATIMA MULILOS – ׀Nîkhami kō !gôab skolgu skol׀gôan Zambezi ׀Kharib din ge māde ╪oago wekheb !nâ skoli !nân ra mā mâ╪oa hâ ai!gûdi 2014 kurib ׀uni !âitsâdi din !aroma gere !khō!oa.
Nausab ge nē !gâi ai!gûs !aroma !gâi!gâba gere ǁkhoreba ǁhao-aona, xaweb ge Zambezi ׀Kharib di ׀Kharisi Mû╪amaob, Lawrence Sampofuba ǁîb ╪âi╪hansens tsîna gere gowa╪ui, mîb gerese ╪auna skolgu ׀kharib !nâ hâgu ╪ause ai!gûs !nâ ra ǁnāǁgôasa. Sampofub ge ǁkhāti ge mî, ǁîb ra ╪an!gâsa ǁgau!nâ-aon tsî ׀gôan tsîn hoan ╪khâ!nâsa ╪hâba hâsa nē mâsiba !gâi ׀khāb ǁga unus !aroma.
“!Kharu ge !nona kurigu ǁaeba ta ge ׀gapise danasa !hâkhâi hâse gere !gû, xawe ta ge nē kurib !aromasa kaise tsû hâ tsî !aru׀î danasa a !hâkhâi ǁoa. 2011ǁÎ kurib !nâb ge nē ׀khariba 4ǁî !khais ai ge mâ i. 2012ǁÎ kurib !nâ da ge 6ǁî !khais ai ge mâ tsî ǁkhā !haros ai 2013ǁî kuri ge mâ׀gara. Kaise ra garu !gāsa !khais ge ǁgariǁgarisase da ga hoatsama nē ׀kharib !aroma xū-e dī tama nî īs kara, ob ge ׀khariba ǁkhawa nî ǁgôaxa.
Ti ╪gans ge ǁnā-amaga hoa khoen nē ׀kharib din ga ╪hâbasa ╪khâ!nâsa sada skolgu di ǁgau!nâ-aon tsî skol׀gôana a māsa, î da sada ǁgūbas 65 persentgu disa sī!nâ tsî ū׀gara tamas ka io ǁîs xa ׀gapise dī ǁkhā, tib ge ge mî.
Sampofub ge !aru׀î ǁîb di skoldanana gere ╪gan, in !ereamsan tani-ai hâ skolga !gâi tsî ū!oasa ׀gaub !nâ ╪gae╪gui, nēs ׀khāb gere ╪âibasens ge !gâis ╪hawega !âidi ǁaexa tama i hâ hîa !nari╪uihes hîa taoxasiba ׀kharib air a hā-ūs khami. ǁKhātis ge nē !âi╪hawegu di !narihesa sko׀gôan !nurigu tsîna !aorosasib !nâ ra mâi, tib ge gere !khâikhom.
Zambezi ׀kharisi ǁgau!nâs Direkteri, Austin Samupwab ge ǁgâi╪uisendi tsî tsâsendi ׀kharisi mû╪amaob dide !khō!gâ ǁgau!nâ-aon tsî skol׀gôan nî māhe huib tsî ╪khâ!nâs ╪namipe tsî gere mî, ǁgau!nâs ׀kharisi beros sîsenaon a māsenxa ׀khariba omkhâisa tsî !garise ra sîsensa in ǁgūbas nē 65 persentgu di !khar!gôaba tsîn !kharaga sîsen׀gauga ׀aweǁgui hâsa nēsa īǁkhā kais !aroma. “ǁKhāǁkhā!âgu ╪ansaben, skolgu mû╪amaon tsî nau hâ !â׀huru-aon ׀kharisi beros tawa a sîsenxan tsîn ge proxramga !amkhâi hâ, aiǁgause skolga sari, ╪hâbasa hui!nâde mā tsî sao!gâgu ra saride māsa nē hui!nâdi tsî ׀awemādi ra sîsen╪amhesa mû╪ams ase.
Sid age nēs ׀kha ׀gaisase nî ai!gû ǁnāpab nē ׀khariba ╪guro !harosa !hūb !nâ nî sī!nâs kōse. nēs ge !garise sîsens, ǁgui╪gāsens tsî ׀guixasib xa ׀gui nî īǁkhā kaihe, tib ge Samupwaba gere ׀gon׀gon!gao. Sao ra skolgu ge Xrat 10’s di mâ╪oa hâse ge ǁgaumâihe, Ibbub, Sauzuob, Sikubib, Linyantib, Lusub, Dr Sam Nujomab, Kongolab, Imukusib tsî Nankuntwe !amǁaresa skolga. Xrat 12s !aromab ge Ibbuba hoana ǁgoe╪am hâse ge ǁgaumâihe.