Katima Mulilo – Likolo la Njimo, Bundui, Mezi ni Cafanzo ya Mubu liekelize mihato ya silelezo mwasikiliti sa Zambezi kasamulaho akuzuha kwa kuambalakana kwa linzie ni mabuku, ili zetaseza masimu ni mafulisezo.

Sibuabui walikolo Simon Nghipandulwa naize sikiliti sitaselizwe ki linzie halalu mwasilimo sa 2025/2026, ili mwahala Lungu ni Mbuwana, Njimwana ni Ñulule, ni mwa Sope 2026.

Kuzuha kwacwale kufumaneha kwa Muyako, Masokotwani ni Chinchimane, teñi linzie lisali famayemo akutulaka, ili mayemo abutokwa akulitibela pili lisika hula kale. “Mihato ya silelezo yakapilipili ikalile, kubukeleza mbonyi ni mauza zebonahala kuli lisali zenyinyani,” nekubulezi Nghipandulwa. 

Naekelize kuli lipiho zakuzuha kwa linzie mwa silalanda sa Nehale Lya Mpingana mwasikiliti sa Oshikoto nelibatisizwe, mi sekufamaneha linzie za bucwañi. “Lipatisiso zene ezizwe mwalibaka zamabala amuunda zeli bukaufi nelisika fumana kuambalakana kokuñwi kwa linzie. Likwata zaluna baitukiselize nako kaufela mwanaha kaufela,” nekubulezi Nghipandulwa.

Kutisa cwale, lihekele zelikana 3 119 litatubilwe mi lihekele zelikana 947 lialafilwe, mi likwata zetalu lihasanyizwe kukala la 2 Sope banze basebelisa limotikala zetamelezwi lifayeliso fahalimu.  Zeo kaufela nihali ezizwe, likolo litalimana ni butata, kungelela cwalo ni kulobeha kwa lisebeliso, kufukuzeha kwa limotikala za 4×4, kunela hahulu kwa pula kokutisa kuli kuya kwalibaka zeñwi kutatafale.

Nghipandulwa naize mubuso unze uikambota ni liofezi zeñwi kuli bakone kutusa kwa kufaela. Zeo nihalili cwalo mulimi ya cilaukile Morgan Saisai ubulela kuli butata bukona kutibelwa ka kuankufa kunga mihato ni milimelo yehulisizwe. “Kambe neli ankufezwi halibonwa feela mwalibaka zeñwi. Kono nelisika ankufelwa mi kacwalo neli siilwe kuli lizwale mai,” nekubulezi Saisai.

Natolokile kuli kunela hahulu kwa pula kutisize kuli linzie lizwale kabuñata, nikuimeza limela mwa sikiliti. Saisai nafile mamela hape kuli kulieha kuli faela kukona kutisa butata kwa silalanda. “Zebulaya kaufela zepila likona kutisa butata kakuli likena mwa mubu,” nabulezi. 

Nabulezi hape kuli kuzuha kwa linzie ikana yaba kuli nekutisizwe kikusabakanya hande mubu, mi nasusuelize balimi kuitahanela kulima ni kutahulela kuli lihula lisike la fitelela licalano ili taba yekona kutisa kuli likokwani lifumane mazwalelo.