KATIMA MULILO – Mukwakwa walibima zemashumi amalalu ongungeka Lubuta ni Sachona kwa muwakwa waB8 mwasikiliti sa Zambezi upumehile, kutibela batu babaya kwa likolo ni sipatelanyana. Nihaike mukwakwa ubonahala kuli ufita moku patami neusika beiwa nihaili mutanonyana ulimuñwi mokufita mezi, kutisa lipilaelo.

Kunela hahulu kwa pula mwasikiliti sa Zambezi nekutisize kuli kalulo yeñwi ya mukwakwa ikukiswe, nikukauhanya sicaba. Bayahi ba minzi yeo babapila libima zelishumi kuisa kuzemashumi amabeli kanako yacwale habakoni kuya ni limotikala kwa likolo ni sipatelanyana.

“Mukwakwa wo noswanela kulutiseza zende, kono fa walukauhanya,” nekubulezi Shebo Glen, ili ticele mwasilalanda yasebelisa mukwakwa nako kaufela. “Baituti balofa kwa sikolo, maticele bakatazeha kutaha kwa musebezi, mi yomuñwi hakula motikala ya sipatela yelonga bakuli haikoni kutofita. Sesilubilaeza hahulu kikuli mukwakwa ki omunca kono noyahilwe kusina mitanonyana. 

Kacwalo lwaipuza kuli, kimañi yana nyatezi kuyahiwa kwamukwakwa wo?” nekubuzize Glen.

Limembala zeñwi za sicaba nebafitisize bunyemi bwabona kuli hakuna mabubelo ni masululelo amezi ane ayahilwe kanako ya kuyaha mukwakwa, mi nebaize purojekiti yeo nesinyize masheleñi asicaba. Katengo kakabona zakuyaha mikwakwa mwanaha neka itumelezi kuli kunela hahulu kwapula kutisize sinyehelo ya mikwakwa mwanaha kaufela kungelela cwalo ni sikiliti sa Zambezi.

Muzamaisi wakatengo Mbahupu Tjivikua naize Namibia kanako yacwale isweli kufumana pula yeñata, mi baziba sinyehelo yebile teñi kwa mikwakwa kungela cwalo ni mukwakwa wamunyako waGrootfontein–Mururani, Rundu–Divundu oswelwi kulukiswa ni mikwakwa yeñwi mwasikiliti sa Zambezi.

Katengo nekaize mikwakwa yeñwi seli yalilimo zemashumi amane, kacwalo ibunolo kusinyiwa kipula. Mikwakwa yeo imwamulelo wakulukisiswa. “Macaziba baluna ni balukisi bamikwakwa baka lukisa fokupumehezi mukwakwa mayemo alihalimu hakalulumelela,” nekubulezi Tjivikua.