KATIMA MULILO – Kampani yebona zakuyaha mandu mwanaha kaufela (NHE), ibulela kuli purojekiti yakuyaha mandu alikana myanda iketalizoho kamashumi amane ka asilezi izamaya hande. Hana bulela ni babihi bamakande Labune, sibuabui wakampani ya NHE Mutonga Matali naize kanako yacwale kalulo yakubakanya mubu nikubeya lisebelezo za limbuzi, mikwakwa ni mulilo wamagesi ni mezi izamaela fa 50 pesenti. 

Nazwezipili kutalusa kuli masheleñi alikana bolule bamashumi aketalizo ka aketalizoho (N$55.4 million) asulezwi purojekiti ya kubakanya mubu, mi bayahi basikiliti sa Zambezi babafitelela mashumi asupile bakenyizwe musebezi mwa purojekiti yeo. “Luitekezi kuli kalulo ya kubakanya mubu nikubeya lisebelezo zebulezwi ika feela mwakweli ya Sikulu, kutalusa kuli kuyahiwa kwandu kuka takeka kanako yeswana,” nekubulezi Matali. 

Nabulezi hape kuli zwelopili yenca yeo itaha ni lisebelezo za mikokolombwa yesula mezi hamoho cwalo ni liteshini ze zamaisa zemasila. “Hakuna mezi akana ayema pula hainela bakeñisa kuli lubeya mikokolombwa yesulula mezi. 

Taba ya lisebelezo ze zezamaisa zemasila itisa kuli teko ya mandu inanuhe hainyani, kono hakuna nzila yeñwi sina ha luziba kuli lisebelezo ze zamaisa zemasila mwa Katima Mulilo litezi. Ki kalibaka leo lubakanyize kuli hakuna zemasila zekana liyubauka,” nekubulezi Matali.