Mexuliloshivike omwa lopotwa oibofa ine yovanhu va kwatwa noingangamwifi aishe kumwe i na ongushu yi li lwopo-N$135 000 keedoolopa da yooloka.
Omupopiliko wopolifi Omupedukomufala Kauna Shikwambi okwa ti omulumenhu weedula 26 okwa kwatwa po kOtjiwarongo eshi a hangika nepangwe nosho yo eepela domandrax di li 200.
Omapangwe oli li pongushu yoshimaliwa N$34 000.
Shikwambi okwa ti omufekelwa ou okwa hangika natango noshimaliwa keemuma N$809.
Ovalumenhu vavali, umwe oku na omido 33 omanga umwe e na omido 36 ova hangika nomapangwe e li pongushu yoshimaliwa N$89 000.
Ova kwatelwa keengaba kombinga yoNoordoewer mokati koufiku pefimbo kwa li ve li mobesa.
Opolifi oya hokolola tai ti omapangwe okwa hangika koshi yoshipundi.
Otaku hokololwa kutya ovafekelwa okwa li tava di koSouth Africa va uka moNamibia.
Oshiningwanima shikwao, omulumenhu weedula 23 okwa kwatwa po eshi a hangika nepangwe li li pongushu yoshimaliwa N$9 500 koGibeon efimbo lokomatango.
Natango, moGibeon omwa kwatwa omulumenhu weedula 24 a hangika neepela domandrax 10 di li pongushu N$1 200.
Opolifi oya ti omapangwe okwa monika pefimbo ovanambelewa vopolifi kwa li tava ningi omapekapeko meetuwa.
Opolifi oya kumaida oshiwana shi longele kumwe nopolifi okulopota ovanhu tava longifa omapangwe molwaashi inashi pitikwa.