Okalkpana tja suvana kondisera tji tja munu ondjombo yorutjeno

Home Languages Okalkpana tja suvana kondisera tji tja munu ondjombo yorutjeno
Okalkpana tja suvana kondisera  tji tja munu ondjombo yorutjeno

Ondjoroka ya munikire movature ovengi va Kalkpana ka Pukiro Oministera yOkehi yOmahundju nOvize vyOmomuronga, Sylvia Makgone, tja kondere oruvanda okuraisa kutja nambano orui rwotjirongo rwa paturuka kotjiveta kutja ovature novinamuinyo vyavo ve nwe mu rwo.

Ondjombo indji nambano ya eta osuvaneno kovature votjirongo novimamuinyo vyavo tjinga oyo nambano amai ungura norutjeno nu nai ovo otji va suva kokuranda ondisera motjindjaa ndji kosa ape ozondola za Namibia 120 otjikando atjihe onganda tji mai sokuteka omeva kutja ovo ponganda poo ovo okuhira ovinamuinyo. Nambano auhe ngu ma hepa omeva tji ma sokutjita nai okuranda okakarata korutjeno oko ku make utire pozondola za Namibia omurongo na kombanda otja pomeva auhe ngu ma hepa. 

Ouṋingandu mbwi wa yeterwe i yonganda ndji nousemba wokukambura omahundju notjimariva atjihe kumwe N$270,000 okutopora ondjombo ombe yorutjeno. 

Makgone ma tja ouharupu wonganda ndji ouhatoi wokutja nangwari omuhunga wOministeri yOmahundju yokutja ozonganda nḓe nousemba wokukakmbura omahundju wina za sere okunikorera poo okuparura oviwaṋ0a vyazo i ungura mouatjiri. Na tja ovature va Kalkpana otja tji va ṋiṋa ouṋingandu mbwi wina ve zemburuke kutja pe na ovirongo vyarwe mbi hi na wo mu nao tji vi na ouhepe womeva Okalkpana ke yenene okuvivatera. 

Wina a ningire ovature va Kalkpana okutjevera omeva wavo nozongari nozongama tjinga omeva moruyaveze amaye rire imwe yozomburo zombutiro ozoheṋa. Tjingetjo a kwambere ko ovature votjirongo hi kutja nambano nai omeva otja tji ya rire omapupu motjirongo ma undjire kovature vatjo okukuna kutja ve rikareke novikurya vyavo oveni.