Auleria Wakudumo

ONGWEDIVA – Elelo lodoolopa yaNgwediva ola landa eetenda dokulongifwa pefimbo loiponga yopaushitwe ngaashi efudja, oshikungulu shomhepo, omundilo naikwao. 

Ongwediva oya ninga elelo lodoolopa lotete moshilongo okulanda eetenda noikwafifo ya wedwa po okukwafela oshiwana shavo pefimbo lefudja noikungulu ikwao. 

Mayola wodoolopa yaNgwediva Naemi Amuthenu oye a patulula pambelewa nokuyandja eetenda koshikondo osho hashi ungaunga noiponga yopaushitwe Etitatu. 

Amuthenu okwa holola kutya eshi otashi ulike kutya elelo lodoolopa ole li longekida nole li tula mo okukeelela nokukwafela oshiwana koiponga yopaushitwe. 

Elelo lodoolopa yaNgwediva mokupitila moprograma ei ola yandja eetenda dili hamano odo da kosha ongushu yoshimaliwa shi fike N$140 000 oule womutengenekwafaneko wo2025/2026. 

Eetenda nhatu Odikife peemeta nhano mouxupi neemeta 10 moule omanga dikwao nhatu dina oule weemeta nhano mouxupi nomoule. 

“Eetenda otadi ka yandjwa oshali okulongifwa kovakwashiwana vomodoolopa yNgwediva pefimbo loiponga yopaushitwe ngaashi efudja, omundilo, oshikungulu shomhepo noiponga ikwao oyo hai holoka paushitwe,” Mayola ta holola ngaho. 

Eetenda edi otadi ka kwafela okuyandja omulele nolukalwa lwopakafimbo ouna oshiwana sheli hanga momhumbwe, okulongifwa onga okapangelo ngeenge ovanambelewa vouhaku tava ende momalukanda oshoyo okulongifwa onga onhele yokulideulila kOvangwediva. 

Omukulunhu koshikondo shomundilo oo yo eli omutwe woiponga yopaushitwe Sam Matheus okwa holola kutya oprograma ei otai ka eta elunduluko mokweendelela po oiponga yopaushitwe modoolopa. 

Okwa ti ngaashi oiponga yomundilo oya pumbwa ekwafo la wedwa po li hefi ashike okutuma ookadimanundilo. 

Mayola wodoolopa yaNgwediva okwa indila ovakwashiwana vomodoolopa yaNgwediva opo va tule oukuni kumwe nelelo voo va kwafe oprograma ei. 

“Ovakwashiwana otava dulu okukwafa pakulopota oiningwanima yoiponga yopaushitwe tai holoka mokati kavo meendelelo nokufika kombelewa yokukondjifa oiponga yopaushitwe opo va mone owino yokukeelela ile osho vena okuninga ouna oiponga yoludi latya ngaha ya holoka mokati kavo,” ta ti ngaho. 

Elelo lodoolopa yaNgwediva olina yo omhangela yokulanda eetenda da wedwa po meedula dokomesho opo li nghonopaleke nokushonopaleka oiponga yopaushitwe. 

-awakudumo@nepc.com.na