Ongwedivas !Ā!khōmais ǀAwemā!nans ge !hū!âde student hâ!khain di ǂnuwihes !aroma mās di sîsenxasigu di ǀams ai ǁaupexa hâ, ǁgoaǂuis ǀgaisase ǂharo ra !gôagu ǁkhāǁkhāsen ra student di hâ!khaiosis ǂnamipe hâse.

ǀGūǁaes ge ǀawemā!nansa ūhâ i saridi, student ra hâ !khaiga si mûs !aromas khao!gâs ge Ongwedivas di !ā!khōmai-aos, Naemi Amuthenusa ǁîs di ǂkhîo!nâsiba ­nā mâsib ǂnamipe ge ǁgâiǂui, ǁnāti ī mâsib !nâ-i khoe-e a hâ ǁoa tis gere mîse. “Sida ǁgansi mûdi ǀkha da go mû mâsib ge ǂkhîǂkhîsa tama hâ. Studentn ge ǁnāpa nî hâse i !gôaba !nā hâse hâǂamaigus, ǂnaumâisa !nā-omdi tsî !norasao!nâ !â!âgu tsîna !khōǂgā hâ, naun mâsig xa ǁgarihe hâse kaise !nū kilometerga ǁkhāǁkhāsens !aroma tsēkorope ra !gûǁnâ hîa, ǁîn ǁkhāǁkhāsen!khaigu ǀgūse ǁom!khaina a mātare ǁoa amaga,” tis ge Amuthenusa ge mî. Ongwedivas ge ǀawas !ādi !nâs ­ǁîsa !kharaga ǀgapi ǁgau!nâ!khaiga ūhâ !āsa, ǀorodomma haka universitaitdi tsî kollegedi tsîna.

Xawe hâ ǁgoaǂuis ge, ǁnāpan studentna !norasa, mātares ai sī!nâhe ǁkhā tsî ǁkhāǁkhāsensa ra hui!nâ hâ!khaina ūhâ tama hâs disa. “!Hū!âdi ge noxopa dītoasa tama hâ, xawes ge ǀawemā!nansa ǀgaugu ǀkha a ǁaxa nēsa ī ǁkhā kais !aroma. ǀGuitimî tsî da sida ǀgaugu tsî ǀawede nî dītoas kara, o da ge !gâibasensa ūhâ !âǀhuru-aon ǀkha ǁnâugudi !nâ nî ǂgâ,” tis ge Amuthenusa ge mî. Ai!âs ge mîsa !oan ge hâ!khaina mario!nâ tide, xawe studentn xa a sī!nâhe ǁkhā ǂgangauba nî ūhâ.

Amuthenus gere mîsa !oas ge studentn di hâ!khaina ǂnuwisa ǁîn ǀguina sâsa ǂnamipeb !nâ ǁkhāǁkhāsensamā tide, xawe ǀAwemā!nans !aromas tsîna !ās di sâuǁkhāsiba ǀomkhâi kais !nâ nî hui ǁîn !ēs ǂnuwisîsengu, ǁguiridi tsî sîsenga ǂnuwis disa nî hō amaga. Amuthenus ge ǂkhari tsî ǁaeguǀnōb ǂharugun (SMEs), aitsama mâbasen ǂnuwi-aon tsî kai ǂharugu-aon tsîn ai ge ǂgan, aiǂhomisen tsîn ǀawemā!nans ǀkha ǂharuguǀhaos !nâ nî ǂgâsa, ǀguitimîs ga nē ǀaweǁguib ǀkha a ǂnāǁnâ soab ai. “Sida ge hoa !âǀhuru-aon hîa nēs !nâ !gâi!gâibasensa ūhâna ra ǂgan, sida ǀkha sîsenǁares !aroma hoan kha ǂhomisase hâsa,” tis ge ge ǀamǀam.