Auleria Wakudumo 

Opolifi yaNamibia oya dimbuluka ovanambelewa 17 ovo va kanifila eemwenyo davo moilonga oule weedula heyali daka dilongela. 

Opolifi oya dimbuluka ovanambelewa ovo va tetekela nale mefiku lokuvadimbuluka mounyuni olo alushe hali kala ko mu07 Malitsa odula keshe. 

Neudo, efiku eli ola dimbulukwa Olomakaya. Efiku eli ola totwa po kopolifi younyuni hano oInterpol mo2019 okudimbuluka ovapolifi ovo va xulifila moilonga. 

Okudja mo2019, Namibia okwa kanifa ovapolifi 17 okudja koitukulwa ya yooloka moshilongo omanga tava longo nokuamena oveta noshiwana shaNamibia. 

Minista woikwameni neameno lokeengaba Lucia Iipumbu okwa holola kutya ouministeli owa pumbwa okulundulula onghalo yokulonga yovapolifi opo ku ninipikwe omafyo ovapolifi tava xulifile moilonga. 

“ Otwa pumbwa okunghonopaleka nokuyandja owino tau ningwa okupitila mokuyandja omadeulo kovapolifi nokuva kwafela moipambele yopamadilongo,” Minista ta holola ngaho. 

Iipumbu okwa ti ovapolifi ovo va xulifila moilonga ovo omapendafule oo eli yandjela eemwenyo davo okuxupifa oshiwana. 

Minista okwa yandja omahekeleko kovakwapata vovanmbelewa 17 va xulifa nokukwashilipaleka kutya otava kala nokudimbulukwa alushe molwa oilonga yavo youpenda ya longela okuamena oshiwana nekotamhango laNamibia. 

Kakukutu komatanga opolifi yaNamibia Inspector General Joseph Shikongo okwa holola kutya efiku eli otali va dimbulukifa kutya opolifi kaishi ashike oilonga yopambelewa ndele eifano. 

Okwa ti eifano eli ohali pula ovanambelewa va tule ombuda moshixwa mokuliyandjela okuamena oshiwana shaNamibia. 

Shikongo okwa holola yo kutya efiku eli ihali dimbulukwa ashike moNamibia ndele omounyuni aushe. 

Okwa pula ovanhu opo va dimbuluke nokutumbaleka ovo vetu tetekela omanga tava longo oilonga yavo. 

-awakudumo@nepc.com.na