New Era Newspaper

New Era Epaper
Icon Collap
...
Home / 15 000 ye li momusholondondo gomayindilo gomagumbo mOshakati

15 000 ye li momusholondondo gomayindilo gomagumbo mOshakati

2022-07-26  Victoria Kaapanda

15 000 ye li momusholondondo gomayindilo gomagumbo mOshakati

Nonando elelo lyondoolopa tali kambadhala okugandja omahala kaakalimo yawo, natango aantu ye li 15 000 oye li metegelelo sho ya ningi omayindilo.

Mayola gondoolopa yaShakati Leonard Hango, okwa ti aantu ayehe mboka oya ningi omayindilo no ye li mompumbwe yomagumbo.

“Ota tu kambadhala  nuudhiginini okushonopaleke omwaalu ngoka, ngaashi naana twa li twa uvanekele aakalimo yetu kutya monakuyiwa, kehe omukalimo oku na okukala e na ehala nenge egumbo lye mwene,” ta fatulula ngaaka.

Hango ta ti, kehe ngoka a ningi omayindilo, otaka mona ompito yokutunga nenge yoku tungilwa egumbo lye.

“Ita tu kaya momusholondondo kutya olye a ningi omayindilo tango, ihe ota tu gandja ompito kwaayehe ya ningi omayindilo,” ta ti ngaaka.

Ta gwedha po kutya oyendji ohaya ningi omayindilo, ihe ethimbo sho ta li kathika, kayena oshimaliwa shoku tunga nenge inaya gwanitha, ethimbo ndyoka.

Mayola okwa popi kutya oya kala noku gandja omagumbo oshowo omahala kaakalimo yawo no taya tsikile okugwanitha po shoka ya uvaneke sigo yeshi gwanithapo.

Elelo lyondoolopa olyi li metifa oku opaleka omahala gamwe kEhenye oshowo omahala gamwe mOshakati, hoka taku katungwa omagumbo gaakalimo.

“Ota tu kumagidha wo aakalimo ayehe mboka kaayena omalukalwa gawo yene, yena iiyemo yi li hwepo nenge yi li pevi  opo ya ninge omayindilo,” ta kumagidha
ngaaka.

Okuninga eyindilo lyehala nenge lyegumbo ihaku pula oshimaliwa, ihe omayindilo ohaga ningwa oshali sha muhongi poombelewa  dhelelo lyondoolopa.

Oyendji kayena ontseyo nkene yena okuninga omayindilo , ihe shoka inashi kala uupyakandhi.

Selma Nashongo okwa ti, okwa ningi eyindilo lyegumbo omimvo mbali dha piti, ihe natango ina pewa ehala lyokutunga.

“Onda inekela kutya omahala ngoka tagaka gandjwa mEhenye naga kwatelemo wo mboka ya ningi ethimbo ya ningi omayindilo ihe inaya mona natango,” ta ti ngaaka.

Ta ti, nonando itayaka hogolola, naya tale ngaa mboka ya ningi ethimbo momusholondondo.

Vkaapanda@nepc.com.na


2022-07-26  Victoria Kaapanda

Share on social media