OMUTHIYA - Omuprimaminista Saara Kuugongelwa-Amadhila okwa holola kutya epangelo ole shi pondola okuongela eemiliona N$99 okudja meepelesenda mbali doyuuyemo, odo omukwashiwana keshe a li a pulwa e liyambele oshikukuta.  

Kuugongelwa-Amadhila okwa ti oshimaliwa osho osha ongelwa okudja kovanhu oohandimwe, ovanangeshefa nokookaume kopaiwana. 

Omupirima edi okwe di holola onghela pefimbo loshoongalele kOmuthiya, oko a lombwela oshiwana kutya Presidente Hage Geingob nomupedupresidente Nangolo Mbumba, naDr Peya Mushelenga navo ove liyambela oshikumungu eshi. 

Osheetwapo shokuliyambela oshikukuta oshe ya eshi Geingob a li a ninga eingido kutya oshikukuta osho shi li moshilongo osha nyaa keonga nosha pumbwa ekwafo lomeendelelo.