“Onda kala handi dengwa kovamwamememati, ohava u langetava ti kutya ondi mwii vati ina ndi dalwa kuina. Meumbo latate onda tewa mo kovamwamememati shaashi vati ondi mwii.”
Aa omatumbulo aaNelao Shipulwa weedula 37 ta koholola nghee a kala ta mono oixuna a kala noku hepekwa kovamwainamati oule weedula natu dapi.
Oivando molutu, nonghalo yanyika oluhodi otai ulike ouyehame nonghalo yepiyaano, molwa omahepeko mwa kwatelwa edengo olo vati a ningilwa kuvamwaina, nokuli le mu etela opo a kanife neteelelo leemwedi nhatu.
Pefimbo Kundana a talela po omukukainhu ou keumbo lavo komukunda Ohaingu okwa hokolola ta ti konima eshi xee a fya vamwainamati pamwe naina ova tameka okumutonda noku mu hepeka.
Okwa ti xee okwa fiya po eumbo lili koWindhoek ashike vamwainamati ove mu taata mo meumbo tava ti kutya nadje mo shaashi vati ina dalwa kuina.
Shipulwa okwa ti eshi ina novamwainamati va fyuulula oshimaliwa shopendjela ya xee inave mu pa nande ofilinga.
“Otwa kala ha tu kondjele eumbo novakulu vange vovamati oule weedula ashike eshi nda kala meumbo omo omukulu wange umwe okwa kala nokudenga nge, yee ta ningilenge omatilifo ta ti kutya ota dipaya nge ngeenge ina ndi hala okudja mo meumbo omo,” Shipulwa ta hokolola.
Omudo 2019 okwa ti omonifwa neenghono oshiponga komukulu waye umwe osho she mu etela a we eteelelo.
“Okwa li ndina eteelelo leemwedi natu ashike ola pita po konima eshi nda dengwa komukulu wange. Iha ndi kofa vali nawa shaashi ohandi kala ashike handi li pula eshi nda kala ndi hepekwa kovakulu vange vovamati. Meme alushe oha ame kumwe navamwameme,” Shipulwa ta ti.
Okwa hokolola ta ti konima eshi mumwainamati kwa li e mu denga okwa li a kwatwa po kopolifi nomodolonga okwa li a futilwa mo kuxekulu.
Okwa ti okwa kala nokukonga omakwafo kouministeli wouyuuki ndele ina mona ko ekwafo fiyo onena.
Shipulwa okwa ti paife ohadi keumbo lainakulu shaashi nokeumbo laxe eli lili komukunda Ondiikongela shaashi okwa tewa ko kovamwainamati.
Panduleni Shovaleka ina mumwaina wa Shipulwa oo a kala a idilila omukainhu ou konima yomahepeko, okwa hokolola ta ti osho shili Shipulwa okwa kala ta hepekwa kovakulu yaye.
“Otava kondje omaliko a xe navamwaina koWindhoek naashi osha ka eta opo a dengwa kumumwainamati eshi kwa li taatawa meumbo,” Shovalekwa ta ti.
Penexupifo Shovaleka ina yaShipulwa ye okwa hokolola ta ti okaana kaye okwa li ka pewa oduda imwe peumbo laxe kuvamwaina, ashike oke i fiya po.
Okwa koleka kutya Shipulwa okwa kala ha dengwa kovakulu vaye eshi va kale tava kondjele omaliko a fiwa po kuxee. Ashike okwe li patana kutya kehole omona kadona okwa kala ashike ta popile opo ovalumenhu va lele eumbo olo la fiwa po.