Gwashiti Ndahambelela Tomas (21) okwa kekwa omuliwi noku sa, kukuume ke gwomiihole, shika osha ningwa Etitano lya zi ko momukunda Uuhongo moshitopolwa shaMusati.
Omukuluntu gwopolisi moshitopolwa moka Titus Shikongo okwa ti, oshiningwanima shoka, osha holoka potundi 00h30 yongula momudhingoloko gwaElim.
Otaku hokololwa kutya omulumentu ngoka okwali a keke Tomas omuliwi noshinima inashi shiwika, no kwali adhiika noombululu dha uka muule molutu lwe.
“Omukiintu ngoka okwa li a adhika mondombe yombinzi ye moshana, komuntu gumwe a li a piti po. Aaholike mboka anuwa okwa li ya monika taya ende pamwe ya uka kookamba moshanga shomutenya,” Shikongo ta ti ngaaka. A gwedhapo ta ti, konima yethimbo efupi, oya li ya lopotelwa olutu lwomulumentu ngoka a dhipaga kuume ke komiihole lwa endjelela momuti gu li ookilometa 1 000 okuza mpoka pwa adhika olutu lwaTomas.
Otaku hokololwa kutya oya kala mekwatathano lyopahole ethimbo ele, noye na uunona wu li uyali pamwe.
“Shoka sha etitha edhipago inashi tseyika natango, ye inathiga anyola sha,” Shikongo a popi ngaaka.
Nakufekelwa medhipago ndika, okwa tseyika nedhina Johannes Venick Kaluwa gwomimvo 31, ayambukukile momukunda omo tuu moka mwaniningilwa oshiningwanima.
Aakwanezimo ayehe yo mazimo gaali oya tseyithilwa, nomakonakono gwopolisi oge li metifa okukonakona shoka sha etitha omaso ngoka.
Moshiningwanima inaashifathana omulumentu gwomimvo 49, Fillipus Shipangela Shooya okwa idhipaga nondjembo momukunda Onandjandja Olyomakaya ga zi ko.
Shikongo okwa ti, oshiningwanima shoka osha holoka lwopotundi 19h00 yokomatanga momudhingoloko gwaRuacana moshitopolwa shaMusati.
“Shoka sha etitha eso ndika inashi tseyika natango, nonando pena omahokololo kutya okwa li alombwele kuume ke komiihole esiku ndyoka kutya nemulandula oshoka iteke mumona we,“ Shikongo a hokolola.
Ta ti, konima ye thimbo efupi, omukiintu ngoka okwa li aloptelwa kuunona wopushiinda, kutya owa uvu ondjembo ya topa oku za megumbo lya wo. Omulumentu ngoka anuwa okwa li haya zi pamwe nomukiintu gwe ngoka. Aalumentu yatatu oyali yamagwapo kopolisi sho ya dhenge omulumentu inashi wika, si go eso momukunda Iindangungu moshitopolwa shaShana.
Otaku hokololwa kutya aalumentu mboka yomimvo 21 yeli yaali oshowo omulumentu ngoka anuwa omuniilonga gwetanga lyegameno ena omimvo 59, oya li ya ponokele omulumentu ngoka niiti sigo omeso.
“Kapena uuyelele wa gwana natango kutya oshike sha etitha edhengo lyinyanyaleka sigo onena,”Aiyambo a popi ngaaka.
Aiyambo okwati, omulumentu ngoka okwali a zala okambindja ko kohi nombindja oshowo ombulukweya yina olwaala oluludhe ayihe.
Opolisi otayi indile moshigwana ngele opena mboka ya kanitha omuntu ali a zala iikutu yuukwatya wafa mpoka athike po polisi yaShakati.