Olugondhi lwaalumentu yaali anuwa aamwayinathana olwa huulile meso lyagumwe, sho a tsuwa nombele.
Sha ikolelela kepeko lyopolisi lyiiningwanima yomehulilo shiwike, oshiningwanima shoka osha holoka kOtjomuise moshitopolwa shaKhomas koongulasha dhOsoondaha.
Otaku hokololwa kutya nonando kakwa li elalakano lyanakufekelwa okutsa mumwayina gomumati, okwe shi ningi sho anuwa kwa li ta igamene oshoka nakusa kakwa li ta hulitha olugodhi.
Otaku hokololwa kutya aalumentu mboka ayehe yaali oye na omimvo 16, ihe opolisi inayi totha mo ngele aakwanambwiyu nenge aamwayinanathana ngiini.
Tayi ti, nakusa gwedhina Manuel Clinton okwa li a hala okudhipaga omona, ohanona yoomwendhi hetatu, netompelo kaali shiwike.
Omumwayina gomukandhona anuwa okwa li i indhopo mo ta kelele ohanona kaayi dhipagwe, ihe omulumentu ngoka okwa li ishewe a pilukile po mumwayina gomukadhona.
Ya hokolola kutya Clinton okwa li a dhenge ohanona ndjoka pevi omanga ta tsikile okulwitha omumwayina gomukadhona.
Otaku hokololwa kutya okwa li e mu palutha iikando itatu niilwitho a li a homota, sho kwa li ta kondjitha okugamena ohanona.
Opolisi oya ti, omumwayina gomumati ngoka omufekelwa ngashiingeyi anuwa okwa li wo natango a gamene omumwayina gomukadhona, sho natango olugodhi kwa li lwa sakala pokati kawo.
Tayi hokolola kutya nakufekelwa okwa li a idhopo molugodhi sho a li a mono mumwayina gomukandhona ta lu sho e lithwe mo nayi kuClinton.
Otaku hokololwa kutya Clinton okwa li a kutha okakuwa nelalakano lyokuhahala omufekelwa, sho a li ta gamene omumwayina gomukadhona.
Ya ti, omufekelwa okwa li a pondola oku mu kutha ekuya, ndyoka a li e na meke ee te li ekelehi pombanda yiipeleki.
Clinton anuwa okwa li a tsikile okulwitha aantu megumbo, e na omwele meke, ngoka a li a kuthwa natango komumwayina gomumati e te mutsu nago montulu.
Otaku hokololwa kutya Clinton okwa li a si ethimbo olyo tuu ndyoka.
Okwa hokololwa kutya Clinton okwa li a kambadhala okulwitha egumbo alihe niilwitho ya yooloka, ihe olugodhi okwa li lwa hulile meso lye.
-vkaapanda@nepc.com.na