Omukainhu weedula 28 okwa fya eshi a dipawa kohonda yaye ikulu shaashi vati a hangika eli nomulumenhu waye mu pe Olomakaya moKatutura moWindhoek.

Nakufya okwa tongolwa oye Azora Roree omukalimo womoWidhoek.

Omupopiliko wopolifi moshitukulwa shaKhomas Warrant Silas Shipandeni okwa hokolola ta ti omukainhu ova hangika komufekelwa ve li meumbo lavo tava nu omalodu nomuholike waye mu pe efimbo lokomatango.

Vati omufekelwe okwa pula nakufya kutya pokati kaye nomulumenhu mu pe olye ta kufa po va kale naye mekwatafano lopaihole.

Vati okudja opo omulumenhu oo okwa dja mo monduda ndele ta fiye po omukainhu ve li nomufekelwa ou eli onga ohonda yaye ikulu.

Opolifi oya hokolola tai ti konima yefimbo ovaneumbo hava di meumbo limwe nomukainhu oo ova uda onda ka yomunhu ta kuuu ashike ina ya ko konduda shaashi ka kwa li veshi ngeenge omunhu ta dipawa.

Konima yefimbo omumwainakadona wanakufya okwa ya konduda opo a ka tale kutya oshike kwa li tashi kuu ashike eshi a fika monduda okwa hanaga nale mumwaina a xulifa a nangala
kombete.

Opolifi oya hokolola tai ti omufekelwa ina hangika mo monduda eshi a faduka po diva konima eshi a dipaa mukwao.

Ovananeumbo ova shifivila opolifi diva kombinga yoshikumungu eshi nokonima eshi opolifi ya fika oya kala ili molukongo lokukonga omufekelwa oo.

Omufekelwa okwa kwatwa po efiku tuu olo a longa oshimbuluma efimbo lokonguloshi notaholoka momhangu nena eshi ta pangulilwa oshibofa shedipawo.

– fhmalwa@nepc.com.na