Omukainhu weedula 33 okwa tuwa nombele okufya komulumenhu waye shaashi a li ta kendabala okuxulifa po ekwatafano lopaihole olo vati va kala ve na efimbo lile.

Oshiningwanima eshi osha ningwa mOkongo moshitukulwa shaHangwena okupendukila onghela.

Komufala wopolifi moshitulwa shaHangwena Commissioner Elizabath Sibolile okwa koleka oshiningwanima eshi.

 Okwa hokolola ta ti ovaholafani ava okwa li tava tanguna fiyo tashi eta olwoodi pokati kavo.

Omufekelwa weedula 34 vati okwa ka twa omukainhu waye nombele mombuda nomhulo loikando ihapu nomukainhu opo a xulifila ponhele opo.

Opolifi oya hokolola tai ti konima yoshimbuluma omufekelwa okwe litwala kopolifi yemwene a ka lombwele ovapolifi kutya okwa dipaa.

Umwe womovakwapata vanakufya okwa hokolola ta ti efiku olo omufekelwa okwa tokelwa vati keendingosho ta nu omalodu onghee eshi e uya meumbo okwa tameka okudenga omukainhu waye te mu pula kutya oshike a hala oku mu efa.

Vati ovaholafani ava ova kala shito mekwatafano lopaihole tali shongola eshi alushe va kala nokutanguna.

Oshiningwanima eshi osha ningwa pefimbo lomutumba wovalumenhu u li metifa mOngwediva omo ovalumenhu tava kundafana nghee ve na okuxulifa po oimbuluma ngaashi okudipaa nokukwata ovakainhu onghonga.

Etivali eshi omutumba wovalumenhu wa patuluka pambelewa mayola wodoolopa yaNgwediva Taarah Shalyefu okwa kumaida ovalumenhu opo va kale tava ka konga omakwafo kovaxungimwenyo ile kovafitaongalo ngeenge ve na omaupyakadi momakwatafano opaihole avo shaashi okudipaa omukainhu kaku shi ekandule po lomukundu.

Oshivike sha dja ko okaana kokadona keedula 13 oka kwatwa onghonga komulumenhu wopoushiinda shavo komukunda Onandjila moshitukulwa shaMusati.

Opolifi oya hokolola tai ti nakuninga oshihakanwa okwa shakena nomufekelwa kefundula la li pomukunda wavo onghee okudja opo omufekelwa okwa heka okaana opo va ye nako keumbo lavo ndele ta i nako moixulo.

Omufekelwa ina kwatwa po natango shaashi opolifi oye lipyakadila nokuninga omakonakono.

Oshiningwanima shimwe shekwatonghonga, omukainhu weedula 27 okwa kwatwa onghonga komulumenhu ou vati kwa li e mu heka opo va ye naye keumbo laye moWindhoek.

Opolifi oya hokolola tai ti omufekelwa okwa ningila omukainhu omatilifo ndele ta i naye moixulo meumbo laye.

fhamalwa@nepc.com.na