Omunamimvo 41, okwa mangwa po kopolisi moshitopolwa shaMusati sho a fike po oondunda dhomwiidhi dhi li hamano, ndhoka dha langata po thiluthilu Osoondaha ya zi ko.
Omukuluntu gwopolisi moshitopolwa moka Titus Shikongo okwa ti oshingwanima osha holoka potundi 12h55 yomutenya momukunda Omatwadiva moshikandjohogololo shaKalango.

“Otaku hokololwa kutya omumati ngoka, okwa li ya hangukununwa kuyina, sho kw ali taya nyenyeta nomuniilonga gwomegumbo lyawo. Yina okwa li a gama komuniilonga, oshoka aniwa omonamati oye e na epuko,” Shikongo ta ti ngaaka.
Ta ti, omulumentu ngoka okwa li a tondokele kelugo, e ta zi ko noshikuni shomulilo nokusameke oondunda adhihe dhomwiidhi dhi li hamano.
Shikongo okwa ti, moondunda moka, omwakanena oshindji, oshoka dhimwe okwali oondunda dhokulala, nodhokupungula  nosho tuu. Oondunda adhihe dhafikwa kamuna nando osha shahupumo, mwakwatelwa uuthemba  woshilongo waanegumbo.

Moshiningwanima inaashi faathana omulumentu gwomimvo 47, okwa imangeleke nombindja ye momuti, moshitopolwa omo tuu moka Osondaha ya zi ko.
 Otaku hokololwa kutya, omulumentu ngoka okwa li a zi megumbo ta ti, otayi kokandingosho ke puundunda wopomukunda gwawo, ihe ina galuka we kegumbo. Okwa li a adhika momuti gumwe a  imangeleka nombindja ndjoka a li a zala.
Oshiningwanima shoka oshaholoka potundi 18h00 yokomatango, momukunda Okaandi momudhingoloko gwaTsandi.
Okwa tseyika nedhina Eino Mwakola Uushona, gwomomukunda omo tuu moka. Inathiga ashanga shoka she mu thiminike opo a ikuthe omwenyo.
Aakwanezimo ye oya tseyithilwa, nomakonakono gwopololisi oge li metifa.