Omulumenhu weedula 27 okwa fya Osoondaxa eshi a pila mobashu yaye efimbo longula potundi 06h00 kolukanda DRC modoolopa yaSwakopmund.

Nakufya okwa tongolwa oye Marvellous Marvin Gauseb omukalimo womoSwakopmund.

Omupopiliko wopolifi moshitukulwa Erongo inspector Ileni Shapumba okwa hokoholola ta ti omulumenhu okwa li a kofa pefimbo eshi obashu yaye kwa li tai pi.

Opolifi oya ti Gauseb okwa li e uya keumbo lamumwainakadona potundi 23h00 ta kongo omuleli shaashi kakwa li e na apa ta nangala efiku olo nokonima mumwaina okwe mu pa opo a ka nangale monduda yamumwainamati ou kwa li a hangika a dja po efiku olo.

Ongula yoSoondaxa mumwaina kadona eshi a penduka okwa mona ovanhu va ngudumana pobashu ei  mwa nangala Marvellous tai pi.

Mumwaina okwa lopotela kadima mundilo, nokonima eshi kadima mundilo a fika okwa hanga nale omulumenhu a fya eshi a pya.

Olutu laye ola twalwa kokila yopolifi koshipangelo shaSwakopmund opo li ka ningilwe omakonako.

Opolifi oya ti kape na ouyelele kombinga yosheetifi shomundilo onghee omakonakono opolifi otaa twikile.

Opolifi oya kunghulila oshiwana opo shi kale sha kotokela omindilo shaashi okwa didilikwa odoolopa yaSwakomund noWalvisbay hadi pi eebashu loikando ihapu.

– fhamalwa@nepc.com.na