Festus Hamalwa

Abner Iyambo Petrus weedula 46 okwa fya eshi a dipawa keendjamba exuliloshivike. 

Oshiningwanima eshi osha ningilwa momukunda Okatha-Kiikombo, moshitopolwa Omusati. Opolifi oya koleka oshiningwanima eshi.

Commissioner Titus Shikongo okwa hokolola kutya Petrus okwa li mepya pamwe nomukulukadi waye nounona tava taataa eendjaba odo da ponokela epya lavo. 

Ova kendambala opo ve di shinge mepya nokonima eshi da dja mo mepya ova twikila natango oku di shinga fiyo okekove.

Ondjaba imwe oya tanauka nokuponolela omunyeumbo ou kwa li e li monima noku mu longela oilonga youshada, elao linene omukulukadi nokaana ova faduka po.

Olutu laPetrus ole lituwa ongula yOsoondaxa lwopo 07h00 kovakalimo vomomukunda wavo. 

Ovakwapata vaPetrus ova shiivifilwa onghundana yefyo eli, nomudimba waye owa twalwa kokila yopolifi yaKahao.

Oshiningwanima shikwao shefyo osha lopotwa mOhangwena momukunda Otunganga, efyo lounona ve li vavali voukadona ova fya eshi vakwatwa koluvadi Olomakaya efimbo lokomatango.

Omupopiliko wopolifi Kaume Itumba okwa ti ounona okwa li ve li mepya pefimbo lokomatango eshi odula ya tameka tai loko.

Itumba okwa ti odula okwa li tai loko unene nomiti dihapu efiku olo oda fundauka po komhepo. Oonakufya ovo Veronica Jeremiah weedula nhee naToini Nanghonda weedula heyali.

Omalutu oonakufya okwa twalwa kokila koshipangelo shEenhana.