Omunangeshefa oshowo omunafalama gwomiti Thomas Kanime okwa yambidha ehangano lyoku kwathela aantu taya nyengwa oshowo yena oluhepo, Kwafela Oshiwana nomiti dhiiyimati dhili 225.

“Onda gandja shoka tandi vulu oku yambidhidha nasho oshoka osho ndi na. Okuyambidhidha okwa kala shimwe sho miinakugwanithwa yandje yonkalamwenyo, ku ke kehe gumwe,” ta popi ngaaka.

Ta ti, onda gandja iiyimati ngaashi, omahapela, oongongo, omamengo, omabanana noyindji yindji, mwa kwatela omuti gwohanana, ngoka gwa simanekwa kutya ohagu kwathele aantu yena oosuka oshowo ombinziya londa.

“Onda kwatwa kohokwe okuyambidhidha Kwafela Oshiwana oshoka okwali nda ndhilindhilike oshilonga nesimano lyiilonga ye hangano ndika. Ehangano ndika ohali yambidha aantu mboka taya nyengwa oshowo yeli muupyakadhi noluhepo,” ta fatulula.

Kanime okwa ti, osha ikolelela kehangano lyolyene, kutya olya hala oku kalongitha shike omiti dhoka.

 “Kutya oya ti otaya ka landitha nenge otaya ka tota oshikunine shiiyimati yawo, otashi zi kuyo yene,” ta ti ngaaka.

Ta gwedha po ta ti, omiti dhe ohedhi landitha  N$50, nongele oya landitha ota ya vulu okumona oshimaliwa shi vule poN$12 000.

“Nontseyo yandje ndjoka ndina, ondi na  ohokwe natango okugandja uunongo ku kehe ngoka a hala oku tameka oshikunino she. Kehe gumwe okwa manguluka oku dhenga ongodhi,” Kanime ta ti. 

Omulongisikola Selma Shiweda gwomomudhingoloko wOkatana mOshakati okwa ti, okwa yambidhidha nooshako dhiilya dhili ine oshowo oshako yiikutu.

“Onda gandja shoka ndi na po, opo shi ka yambidhidha yakwetu mboka yeli mompumbwe. Shika onde shi ningi oshoka ondi shi okuhokolola uuwanawa woku yambidhidhwa. Nangaye onde shi ningilwa kaantu kaandi ya shi sigo onena,” ta popi ngaaka.

Ta kumagidha ta ti, kehe ngoka wuna oshikutu nenge kehe shoka inoo shi hala we, ino shi ekelahi, shi gongela, e to yambidhidha kwaamboka yeli mombumbwe.

Justine Thomas gwomOngwediva okwa ti, okwa yambidhidha nooshako dhiikutu mbali, oshako yimwe yoongaku oshowo otona yimwe yuudha omatanga.

“Okashona oke vule owala, shoka twa yambidha nasho otashi ka kwathela gumwe nenge yaali,” ta ti ngaaka.

Omukulununtu gwehangano Kwafela Oshiwana Cornelius Paulus, okwa pandula a yehe ya mbidhidha ehangano ndika, opo lyi shiwe lyi ka yambidhidhe mboka yeli mompumbwe noonkondo.

“Kehe siku pomiyelo dhetu otapu konkolwa, kaantu taya indile omakwatho, onkene ohatu ka mbadhala okuyambidhidha naashoka shili po  oshowo shoka tatu ya mbidhidhwa nasho,” ta ti ngaaka.

Ta ti, ota indile komalelo agehe gopamuthigululwakalo moshilongo, opo ga yambidhe ehangano ndika naashoka taga vulu nasho, opo ya kwathele oshigwana.