New Era Newspaper

New Era Epaper
Icon Collap
...
Home / A hahala oombwa nomukiintu gwe omanga ina imangeleka

A hahala oombwa nomukiintu gwe omanga ina imangeleka

2020-09-17  Victoria Kaapanda

A hahala oombwa nomukiintu gwe omanga ina imangeleka

Omulumentu gwomimvo 39 Mushiwete Wilho Pilukeni, okwa hahagula omukiintu gwe gwomiihole nekatana iikando iyali omanga ina imangeleka Omaandaha ga zi ko momukunda Onandova.
Omupehakulunntu gwopolisi moshitopolwa shaHangwena Zacharia Amakali okwa ti, oshiningwanima shoka osha li sha holoka potundi 23h00 yuusiku moshitopolwa shaHangwena.

“Otaku hokololwa kutya omulumentu ngoka okwa li a hahagula kuume ke komiihole sho a li e mu lombwele kutya ohole yawo nayi hulile mpoka, shoka a li inaa hala oku shi taamba ko nokushi uva ko,” Amakali ta ti ngaaka.
Amakali okwa ti, omukiintu ngoka  kwa li ha longo megumbo lyopuushinda womulumentu nguka,  okwa li a hahalwa nekatana pothingo nolutiyali mepepe lyokolumoho .

Omukiintu ngoka aniwa okwa li a hupu oshoka okwa li a falwa a ka mone epango koshipangelo shEngela meendelelo, nangashiingeyi aniwa oku li monkalo yi li hwepo.
Otaku hokololwa kutya manga kwa li inaa hahala kuume ke komiihole, okwa li a dhipaga tango oombwa mbali dhomegumbo lyandjawo nekatana tuu ndyoka a ka hahala nalyo omukiintu ngoka.

Opolisi kayi na uuyelele kutya oya kala pamwe ethimbo lyi thike peni, nongele oye na uunona pamwe.
“Omulumentu ngoka sho a li a hahala omukiintu gwe okwa li a yi mondunda yokulala e ta imangeleke nongodhi  moombuli dhondunda,” Amakali a popi ngaaka.
Aakwanezimo oya tseyithilwa nomakonakono gopolisi oge li metifa.
Opolisi otayi kumagidha oshigwana shi kale tashi lopota omawupyakadhi gawo kopolisi, pehala lyokwiikuthila ooveta miikaha yayo yene, yo taya ka imonitha iiponga nokudhipagathana.
 


2020-09-17  Victoria Kaapanda

Tags: Khomas
Share on social media