Victoria Kaapanda

ONGWEDIVA - Omukwashigwana gumwe gwokomukunda Ohalushu mOshitopolwa shaHangwana okwa pula opo epangelo lyi ethe oongeleka dhi patuluke.
Helena Nhinda ngoka a ti ye omwiitaali omukriste okwa pula kutya omolwashike omahala gokugalikanena taga patwa omanga omahala gwokulandithila ga pata? Ta ti ndjika oyo ompito ombwaanawa ya kehe gumwe a ye kongeleka.
“Oshike omahala gamwe haga gongalwa kaantu oyendji inaaga patwa sigo onena? Aniwa oga simana itaga vulu okupatwa naya pewe omilandu ye na okulandula. Omanga ehala lyaKalunga ngoka oye e na okugandja ayihe tali patwa, etokolo ndyoka olya puka, lyo olya pumbwa okulundululwa,” Ntinda a popi ngaaka.
Okwa gwedha po ta ti aaleli sho ye li komeho goshigwana, oye li ko koonkondo dhaKalunga noya pumbwa okukutha omatokolo ge li mondjila, ngoka taga simaneke Kalunga tango.
Nhinda okwa pula ta ti sho oshigwana sha pulwa shi galikane, nena otashi galikanene peni? ngele oongeleka odha patwa, otaya galikanene miihwa nenge omomaagumbo? Ta ti momagumbo ohaya galikanenemo shito oshowo kehe ethimbo, oongeleka sho dha totopwa omolwa omagalikano.
Ta ti ehala lyomagalikano olyi na okusimanekwa. Kalunga oha galikanwa mehangano. Nhinda okwa popi ta ti ongeleka sho ya pata ngaaka oKalunga a patwa. 
Ta hokolola kutya oongeleka inadhi tulwa po kaantu yoyene, ihe odha tulwa po kuKalunga yemwene, ta ti  shika osha pumbwa okutaliwa nawa e tashi lundululwa, ta ti ihashi shiwa oongeleka dhi patwe, mboka owo uulunde tawu etwa mokati kaakriste.
“Otwa landula ondjila yiikalunga, natu pulakeneni, ee tatu dhimbulula shoka shi li mondjila. Otwa taalela omukithi gwa nika oshiponga ngoka tagu hokololwa gwa dhipaga aantu omayovi kiilongo yilwe, nena olye e na oku gu kandula po ngele ke shi Kalunga, ihe shoka ote shi ningi uuna te shi indilwa ano ta galikanwa mehala lya simanekwa,” Nhinda ta popi ngaaka.
Nhinda ta popi ta ti payife okuwete nokuli sha fa uudhano, omukithi otaye gu galikanene peni gu hulepo, ngele ogu na okugalikanenwa mongeleka mehala lya simanekwa. Ta ti ota fekele pwa fa pe na sha sha halika  okuningwa moshilongo, nenge shi ye moshilongo kasha na ekwatathano naKalunga.
Okwa li a kumagidha oshigwana ta ti naya konge omuwa Kalunga, opo wo ya dhimbulule noya simaneke kutya, sho ya thikama sigo onena omolwoonkondo dhaKalunga ngoka kee vulike  nando oonkondo komuntu.