“Onkalo ndi li muyo inandi yi halela omuntu gomwenyo, ondhigu nokayi shi oku indhindhimikilwa.” 

Ndhoka okwa li dha popiwa komukulupe gwomimvo 65 Simon Paulus ngoka a li a kanitha iilyo yolutu omolwamukithi gwoPolio ngoka gwa li gwe mu kwata omimvo 51 dha piti, sho a li e na oomvula 14. 

Onkalo mu na Paulus oyi iwetikile nale okuza komweelo gwegumbo lye ndyoka lyi li kohi yomwiidhi gwa dhingoloka egumbo, nezimba ito li indhindhimikile uule wethimbo. 

Paulus ngoka ha ende nolutu okwa ti, onkalo oya li ya tameke oku mu dhigupalela omimvo mbali dha piti, sho yina ngoka oye kwa li he mu yambidhidha a hulu ko mo2021. 

‘’Onkalo ndjika ndi li muyo oyomuntu ashike ta fudha, oshoka omwenyo omo gu li. Ohandi ende 

nolutu, ihe paife ihandi yi we kokule oshoka uukulupe nawo wa thiki,” ta popi ngaaka. 

Ta ti, uupyakadhi uunene a talele owokwaa na okatemba. Nonando kwa li a yambidhidhwa nakamwe okuza moshigwana, okwa li ka shunithwa ko oshoka itaka opalele onkalo ye. 

Ta hokolola ta ti, okwa ningile omasiku gaali neyoka mondunda, ihe kakwa li ta vulu okuninga sha oshoka ngele okwa zi ko kombete otali mu li. “Megumbo onda li mo ongame awike, kakwa li ndi na omuniilonga. Oolamba odho kwa li ashike ha kala atema uusiku awihe atula komutse nokomagulu,’’ ta hokolola ngaaka. 

Ta ti, kakwa li oshipu, oomposi kadha li po oshoka omeho oga pwa mo ashike, oshoka okwa li e na uutile pamwe tali ya kombete. 

Ta popi ta ti, ethimbo limwe olya li tali ende lyu uka kuye, nokwa li a kutha otoshe e te li tosho, nokwa li lya shuna. 

“Esiku Etitatu, okwa li mwe ya okanona ka zi puushiinda, ka li ke etela ndje iikulya, nokwa li nde ka hokolele shoka ndi li mo nasho megumbo,’’ Paulus ta ti ngaaka. 

Okanona hoka oka li ka ithana aashiinda, neyoka ndyoka okwa li lya dhipagwa. 

Paulus ta ti, aaniilonga iheye mu kalele omolwonkalo e li muyo. 

Yamwe anuwa ohaya mono N$600 ndjoka he ya futu onshona, nonando iikulya noothewa oye natango te yi landa niihupe ye yopenzela.‘’Omuniilonga ngele okwa kala po pungame oomwedhi mbali elago, omutitatu oha yi. Ngoka ndi li mo naye paife oha kala ashike kookamba, megumbo ohe ya mo ngele a si ondjala,” ta ti ngaaka. 

Ta hokolola ta ti, thimbo limwe ohayi inaateleka. “Ohandi kwata ashike N$1 300 moka omo hamu zi iimaliwa yokufuta omuniilonga oshowo oompumbwe dhilwe. Ohandi longitha wo epya lyandje oshoka kandi hole inaali longwa, otandi si ondjala,’’ ta popi ngaaka. 

Okwa popi wo ta ti, omolwuunkundi we itaa vulu okuthika kiihwa, omanayilona ogo ha longitha onga okandjugo ke, go taga ka ekelwahi. 

Ta ti, omaudhigu gamwe ngoka ogo ihaaga kalekepo aanilonga. 

‘’Omolwa onkalo ndjika ondhigu ndi li muyo, otandi indile moshigwana opo ndi yambidhidhwe nokandjugo oshowo okatemba ka wapalela onkalo yandje,’’ ta indile ngaaka. 

Ta ti, nonando oompumbwe ngaashi iikulya, omatalashe nootoshe oyo yimwe a hala okuyambindhindhwa nayo, okandjugo noka temba oyo tango. 

Omushiinda gwe Anna Kanana okwa ti, onkalo ya taalelwa komushinda gwe ondhigu noonkondo. 

‘’Ngele aashinda inaya enda po opo ye mu etele okulya, thimbo limwe ohayi ashike pombete inaa lya,’’ ta ti ngaaka.Ta ti Paulus omunankondo lela, oha kondjo naampoka ta vulu. Iimaliwa ye yopenzela ohayi pwile ashike moopumbwe dhomegumbo. Ta gwedhapo ta ti, kena nando omuyambindhindhi gumwe, oye ashike tiikondjele yemwene. 

‘’Okatemba nokandjugo oyo oompumbwe onene ta pumbwa lela,” ta koleke ngaaka. 

Ta ti, omeya ge nantango megumbo oga patwa oshoka ogena oondjo. Kans ela g wo s h i k a n d j o h o g o l o l o shOngenga Mathew Shikongo ka kwali a monika pangondhi opo a tyeko sha kehokololo ndika.