Opolisi moshitopolwa shaMusati oyi li mokashoko okukonaakona oshipotha shekwatokoonkodo lyomukiintu gwomimvo 41.
Oshiningwanima shoka osha holoka potundi 00h00 Etiyali lyoshiwike shika momukunda Endjeno momudhingoloko gwaGongo.
Omukuluntu gwopolisi moshitopolwa moka Titus Shikongo okwa ti, omulumentu ngoka aniwa omukokele ihe omimvo dhe inadhi tseyika, okwa li ya ende pamwe nomukiintu ngoka oku za  kuukukamba.

“Otaku hokololwa kutya oya li ya topoka, kehe gumwe a uka kaandjawo. Nani omulumentu ngoka ina ya shi li okwa goyoka e ta landula omukiintu monima. Omukiintu anuwa ngoka okwa li a uvu a kwatwa okuza konima nokuhulwa iikutu. Omulumentu nguka anuwa okwa longitha oonkondo e tayi nomukiintu miihulo kashi li pehalo lye.

Shikongo okwa ti, aniwa aantu mboka kakwa li ye na omahokololo giihole pokati kawo. Omufekelwa ina kwatwa po natango.
Oshiningwanima inaashi faathana, opolisi moshitopolwa shaShana oyi li molukongo lohauto yoHilux Toyota, ndyoka ya yakwa po okupendukila Etine mOndangwa.
Sha ikwatelela kepeko lyopolisi ohauto ndjoka oya yakwa pegumbo, molukanda Omakulukuma, omanga mwene gwohauto a li a kotha. Ohauto odiseela, 2.4 Toyota Hilux, ya fa omwiidhi gwa kukuta molwaala.

“Oya ndhindhilikwa natango noshitenda shi li moshikoto, oshowo etenda lyokuhila lyi li konima yohauto,” opolisi ya ti ngaaka.
Onomola yohauto N 1546 ND. Opolisi otayi indile kehe ngoka e na uuyelele mpoka pe na ohauto ndjoka opo a lopotele opolisi yi li popepi naye.