Okaana komido omuwoi oka tambulilwa meembete ke na oipute momutwe nokoilyo yopaumwene, molwaashi vati ka xwikwa noikuni yomundilo, nokudengwa noikulumbwati kuinakulu. 

Inakulu, omukulupe weedula 65 okwa kwatwa po. 

Okwa hokololwa omufekelwa okwa denga omutekulu molwaashi vati a hanya okukaidilila eengobe koshuunda.

Okudja opo va ti omukulupe ou okwa teelela ku toke ndele ta hondjaunine noku kwata omutekulu waye eshi te uya meumbo.

Oshiningwanima eshi osha ningilwa mexuliloshivike komukunda Onakalunga moshitukulwa shaHangwena efimbo loufiku.

Omukonakoni woimbuluma moshitukulwa shaHangwena omupedu Commissioner Zacharia Amakali okwa kololola ta ti okaana oka tambulilwa moshipangelo shaEenhana molwashi oka mona oshiponga komutwe noshoyo koilyo yolutu.

Omukulupe ota holoka momhangu yamengestalata waEenhana Etivali nota pangululilwa oshibofa shomahepeko omomaumbo.

Omakonakono opolifi otaa twikile kombinga ngeenge okaana oha ka ningilwa omahepeko omomaumbo shito.

Opolifi oya kumaida oshiwana opo shi kale tashi longele kumwe momikunda okukala tashi lopotele opolifi kombinga yomahepeko omomaumbo ta ningilwa ounona shaashi okwa didilikwa ounona vahapu va ninga oihakanwa yokuhepekwa momaumbo.

fhamalwa@nepc.com.na