Festus Hamalwa
Omulumenhu weedula 38 womomukunda Okalongo moshitukulwa shaMusati okwa kwatwa po eshi a xwika po eenduda nomaanda oilya ambulavo.
Omukonakoni woimbuluma wopolifi moshitukuwa shaMusati omupedu Commissioner Moses Simaho okwa hokolola ta ti omufekekwa okwa dja keendingosho efimbo loufiku lwopotundi 23h00 a kolwa.
Vati eshi a fika meumbo okwa tameka ta ningi ewelelo ta ti oku na okulonga oushada meumbo omo oufiku oo.
Opolifi oya hokolola tai ti omufekelwa okwa tema omundilo ndele ta xwike po eenduda nokonomina okwa kufa ekatana ndele ta tete omaanda oilya aeshe noku a tomeka omundilo.
Okudja opo vati omufekelwa okwa kufa natango ekatana ndele ta tetaula omandini aeshe omeva kwa li eli meumbo efiku olo nokonima ta tetaula yoo vali onduda yoipeleki omu hamu tuvikile ina.
Ina yomufekelwa okwa shivifila opolifi konima eshi a mona omundilo wa yaka eenduda meumbo. Ina vati okwa li e na oumbada neenghono kutya pamwe omufekelwa ota xwike po nonduda yaye yokungala.
Opolifi oya weda po tai ti omufekelwa okwa didilikwa ha ningile ina omatilifo shito unene tuu ngeenge tadi keendingosho a kolwa.
Omufekelwa ota holoka momhangu Etine eshi ta pangululilwa oshibofa shomahepeko omomaumbo.
Kapena omunhu a monena oshiponga meenduda da xwikwa po komufekelwa, nomakonakono opolifi otaa twikile moshikumungu eshi.
Opolifi oya kunghilila oshiwana opo shi kale tashi lopotele opolifi keshe ili popepi ngeenge sheli hange tashi ningilwa ominyonena ile omaliko avo ta longelwa oushada.