New Era Newspaper

New Era Epaper
Icon Collap
...
Home / A kwatwa po eshi vati a hangika nomandini omahooli noikolifa

A kwatwa po eshi vati a hangika nomandini omahooli noikolifa

2022-09-16  Festus Hamalwa

A kwatwa po eshi vati a hangika nomandini omahooli noikolifa

Omulumenhu weedula 32 okwa kwatwa po eshi vati a hangika nomandini omahooli 20, oipateke vomalodu ouwhiskey 20 noupateke vomakaya vaheyali.

Omufekelwa okwa kwatelwa komukunda Siyena Etitatu efimbo longula lwopotundi 09h30 koshitukulwa Kavango-Ouninginino.

Komufala wopolifi moshitukulwa shaKavango-Ouninginino Commissioner Julias Sakuwa-Neo okwa hokolola ta ti omufekelwa okwa kwatwa e na oinima ya dja koAngola ehe na eembapila. Omahooli oo paife a pewa edina ngungula, ouwhiskey, nomakaya oo haa di poshishiindalongo Angola, inaa pitikilwa mo moNamibia.

Vati oshiwana osha lopotela opolifi konima eshi sha mona otuwa momukunda wavo tai ende tai landifa omandini omahooli kovakwashiwana. Omufekelwa ota holoka momhangu yaKahenge Etitano nota pangulilwa oshibofa shokuvakela oinima moshilongo oyo inai pitikwa.

Opolifi oya kunghilila oshiwana opo shi twikile nokulopotela opolifi kombinga yoimbuluma tai ningwa momidingonoko davo.

Opolifi oya weda po tai ti oshiwana oshi li meameno ngeenge tashi yandje ouyelele kopolifi onghee inashi kala sha tila shaashi opolifi itai ka popya edina lomunhu ta ka yandja ouyelele. 

fhamalwa@nepc.com.na


2022-09-16  Festus Hamalwa

Share on social media