Omunamimvo 46 okwa mangwa po kopolisi yaShana sho a adhika nomandini gomahooli geli 47 goolita 25, ngoka haka landa koshitopolwa shaHangwena kaashi li paveta.
Omulumentu nguka okwa mangelwa molukanda Ompumbu mOshakati.
Sha ikolelela kuuyelele wa gandjwa komupoliko gwopolisi moshitopolwa shaShana Thomas Aiyambo, omulumentu ngoka okwali a kwatwa koongulasha dhEtiyali.
Otaku hokololwa kutya omulumentu ngoka okwali aadhika nohauto Toyota yoHilux ontokele yuudha omadhina gomahooli goPetrol geli 47, ngoka anuwa a li a ka landa momudhingoloko gOshikango, nonando ohaga zi koAngola.
Aiyambo okwa ti, omulumentu ngoka ohaka landa omahooli momukunda Okatale, hoka ku na omuntu ngoka he kega tala meni, lyaAngola.
“Omahooli ngoka ohega landitha kaanatekisa, N$250 moolita 25. Omahooli ngoka oga indikwa okulandithwa moNamibia oshoka inaga dhindwa nawa, nomolwa omatompelo gamwe ga gwedhwa po,” ta ti ngaaka.
Ta ti, ohauto ndjoka kwali ya adhika nomandini oya mangwa po kopolisi.
“Otaku fekelwa omulumentu ngoka, ethimbo a kwatwa kopolisi, ali taka landitha kOshakati hoka a li a thinda,” ta popi ngaaka.
Aiyambo ota kumagidha aakwashigwana ya hulithe po okulonga iilonga ye shi kutya oya puka.
“Oyendji oye shishi kutya omahooli ngoka oga indikwa mo moshilongo. Nakehe ngoka eshi mpoka pe na omahooli taga landitha na lopotele opolisi yili popepi naye,” ta indile.
Oyendji taya landitha omahooli ngoka, ohaya landithile momagumbo, oshoka oye shi shi nawa kutya shoka taya ningi osha puka.
Omufekelwa ngoka okwa yambukile momukunda Ongenga moshitopolwa shaHangwena.
Moshiningwanima shimwe inaashi fathaana omulumentu gwomimvo 32 okwi imangelekele mondunda yagumwe gwomaapambele ye nodhalate.
Otaku hokololwa kutya oshiningwanima shoka osha holoka potundi 16h00 yomutenya, momukunda Ombata mOndangwa.
Aiyambo okwa ti, omulumentu ngoka okwali a yi kegumbo lyahegona, hoka ali iindile oshapi ya gumwe goomapambele, opo anuwa aka vululukwe po oshoka anuwa kaandjawo okuna ekudhilo.
“Mwene gondunda okwali a ki iyoga, sho a gadja oshapi, sho a kagaluka okwa adha olutu lomulumentu ngoka lwa endjelela moombuli dhondunda nodhalate mothingo,” a hokola ngaaka.
Aakwanezimo oya tseyithilwa.