New Era Newspaper

New Era Epaper
Icon Collap
...
Home / A lulilwa eshi vati a fiwa po komushamane waye oule weedula 12

A lulilwa eshi vati a fiwa po komushamane waye oule weedula 12

2022-06-29  Festus Hamalwa

A lulilwa eshi vati a fiwa po komushamane waye oule weedula 12
Top of a Page

Omukainhu weedula 53 Hambeleleni Mushunina e li omukalimo momukunda Onhuno moshitukulwa shaHangwena ota ti ota dengwa konghalo eshi vati e na omushamane waye e mu fiila eumbo oule weedula 12 paife molwaashi vati te mu li.

Okwa lombwela Kundana Etivali ta ti ke udite ombili eshi a fiilwa meumbo nounona vaye vatatu oule wefimbo lile.

Okwa ti ova hombola momudo 2002 ashike okudja 2009 ova tameka okukala vehe na ombili nomushamane waye eshi hava kala tava tanguna nokulidenga.

Mushunina okwa hokolola ta ti omudo 2010 omushamane waye okwe mu fiya po eshi a ka tunga eumbo limwe kOkongo nomukulukadi waye umwe mupe vati ashike ohombo yavo inai teka natango.

“Okwa fiila nge eumbo inali pwa okulongwa nounona vashona ve li meendodo dopedu kwa li. Onda longifa eumbo eshi nda tunga mo eenduda dihapu, onda tula ko oluumbo lekuma keumbo noshoyo olusheno ashike paife omushamane wange novakwapata vaye otava ti kutya nandi dje mo meumbo lavo,” ta hokolola.

Onghee okwa ti okwa handuka eshi a kala meumbo efimbo lile nokulongifa eumbo noshimaliwa shaye shaashi okwa kala ha kufa omikuli keembaanga.

“Okwa ti okwa ninga eenghendabala dokulombwela omushamane waye a alukile keumbo ashike ohe mu lombwele kutya ite ya ko shaashi vati okwa loloka okuliwa kuye,” ta hokolola.

“Onghee okudja opo onda ya komhangu opo ndi ke mu kwatifwe oshapota yokukala ta nanwa oshimaliwa shounona keshe komwedi shaashi kakwa li e na eshi ha pe ounona,” ta we da po ngaho.

Okwa hokolola ta ti mopaife ngaha omushamane oha nanwa oshimaliwa N$1 500 keshe komwedi shounona vatatu.

“Paife omushamane wange okwa manga nge eshi ndi li meumbo shaashi ota imbi nge ndi ka konge po omushamane wange umwe. Kashiwa eshi ndi li meumbo ndele kali li kedina lange shaashi ondi na oumbada kutya meumbo ohandi tewa mo efimbo keshe shaashi natango oli li kedina lomushamane wange,” ta hokolola.

Onghee okwa ti ota indile opo epangelo li kale la ya mo eenyala moshikumungu eshi shaashi kasha li mondjila eshi e li meumbo e li longifa ndele ta tewa mo.

Ombili Mushunina ou eli oye shiveli shavo, okwa lombwela Kundana ta ti ke udite ombili eshi ina ta tewa meumbo kuxe shaashi ina oye a longifa eumbo olo pefimbo xe a faduka po.

Eshi a ninga eenghundafana naKundana kombinga yoshikumungu eshi, Walter Mushunina ou e li vati oye mwene weumbo noku li xe younona okwa hokolola ta ti meumbo okwa dja mo shaashi okwa loloka okukala ta dengwa komukulukadi nokounona vaye.

“Alushe ohatu kala ashike tatu tanguna efimbo, okwa li nda mona oshiponga eshi omukulukadi wange a denga nge. Okaana kange kokamati koshiveli ohaka kufile nge ekatana eshi hava kala tava hangakene nge naina,” Walter ta hokolola.

Onghee okwa ti okwe va fiya po shaashi okwa hala okukelela oinima ii noshoyo okukwatela po ombili yaye.

“Omukulukadi wange ina fimaneka nge eshi e hole okuya kondje kovalumenhu vamwe. Ashike ngeenge andi popi naye kutya inaya vali kovalumenhu vamwe oha tameke okutuka nge nokudenga nge,” ta hokolola.

Okwa weda po ta ti ngeenge omukulukadi okwa hala eumbo li ninge po laye oku na okufuta N$200 000 sheumbo noshoyo mwa kwatelwa edu alishe shaashi eumbo okwe li landa noshimaliwa shaye mwene.

“Kandi na oupyakadi ngeegnge ohombo otai teka shaashi naame onda hala oku mu mangulula aye nounyuni waye.” 

Walter ta ti.

Okwa weda ko ta ti keumbo ita shuna ko vali shaashi okwa tila oku ka longelwa oilonga yominyonena komukulukadi waye noshoyo kounona.

fhamalwa@nepc.com.na


2022-06-29  Festus Hamalwa

Share on social media
Bottom of a page