New Era Newspaper

New Era Epaper
Icon Collap
...
Home / A si anuwa sho a pelwa ohefa motombo

A si anuwa sho a pelwa ohefa motombo

2020-11-09  Victoria Immanuel

A si anuwa sho a pelwa ohefa motombo

Omulumentu gwomimvo dhopokati okwa hulitha anuwa sho a pelwa ohefa mekopi lyotombo oshiwike sha zi ko, momukuda Adolf, moshitopolwa shaShana.
Omupoliko gwopolisi moshitopolwa shaShana Thomas Aiyambo okwa ti, oshiningwanima shoka osha holoka oshiwike sha zi ko, pehala lyomaninwo tali ithanwa Osile Bar.

“Omulumentu ngoka anuwa okwa li a pewa ekopi lyotombo komusamane gwomukuluntu, moka a li a nu oye awike. Anuwa otombo ndjoka ya li ya hupu mo okwa li ya tilwahi konima a yi,” Aiyambo ta ti.

Otaku hokololwa kutya konima a li a thigi po ehala ndyoka a uka kegumbo, okwa li a adhika kaanamukunda a gwila miihwa.
Aiyambo ta ti, okwa li a falwa koshipangelo, hoka a kala omasiku gaali ta mono epango, omanga inaa hulitha.
“Aakwanezimo oya ti osha kolekwa kundohotola kutya omulumentu ngoka okwa si kohefa,” Aiyambo a popi ngaaka.
Ngoka anuwa a gandja ohefa motombo ina mangwa po natango, nomakonakono gopolisi oge li metifa.

Moshiningwanima inaashi faathana, opolisi moshitopolwa shaShana otayi kongo Josehine Nakandunga (33) ngoka anuwa a ihulwa okumonika  mehulilo lyomwedhi gwa yi.
Otaku hokololwa kutya Nakandunga okwa li a ka lala ethimbo limwe naanegumbo ye, pamwe nakuume ke komiihole ngoka ke shiwike edhina naampoka ha zi.
“Aanegumbo sho ya ka penduka ngangula, aaholike mboka kaye mo megumbo, nongodhi ye yopeke kayi mo mombepo. Ina thiga a popya mpoka tayi,” Aiyambo ta ti.
Otaku indilwa moshigwana ngoka e na uyelele mpoka pe na aantu mbaka opo ya tseyithile aakwanezimo ye.

 
 


2020-11-09  Victoria Immanuel

Tags: Khomas
Share on social media