New Era Newspaper

New Era Epaper
Icon Collap
...
Home / A si sho a pile moshikutu, yatatu ya ikutha omwenyo

A si sho a pile moshikutu, yatatu ya ikutha omwenyo

2020-07-14  Staff Reporter

A si sho a pile moshikutu, yatatu ya ikutha omwenyo

Opololisi mOshitopolwa shaMusati otayi konaakona oshiningwanima moka omukulupe gwomimvo 79 a sile moshipangelo moka a falwa mo niilalo yomulilo. 
Otaku hokololwa omukulupe ngoka a tongololwa nedhina Selma Iileka, (79), a zile komukunda Onkankaa, moshikandjohogololo Otamanzi, a sile moshipangelo mOshakati mOsoondaha ya zi ko.

Omukulupe nguka anuwa okwa li a nonithwa oshiponga noonkondo komulilo ngoka gwe mu thigi niilalalo mbyoka ya fala sigo omeso.
Uuyelele mboka wa gandjwa kopolisi omutenya gwOlyomakaya otau ti Iileka okwa li ta teleke megumbo lye, sho oshikutu she sha yaka omulilo. Okwa li a falwa meendelelo koshipangelo kOshikuku, moka a pitilele mo nokwa falwa kOshakati hoka a ka hulithila. 
 Aapambele ye oya tseyithilwa nale. 

Opolisi mOmusati oya lopotelwa natango iipotha itatu moka aalumentu yaali nomukiintu gumwe ya ikutha oomwenyo moshitopolwa shaMusati. Oshiningwanima shimwe osha ningilwa momukunda Onaitembu moshikandjohogolwa Outapi moka omulumentu omunamimvo 34 Haiyela Tuhafeni Elias a imangeleke nongodhi yolusheno mondunda ye yokulala. Haiyela ina thiga a nyola nenge a popya kutya omolwashike ta ikutha omwenyo. Oshiningwanima shika osha ningwa ongula mOlyomakaya lwopotundi 07h26.  

 Omukiintu Rut Panduleni Alfeus omunamimvo 51 okwa adhika a endjelela a sa, notaku fekelwa kutya naye okwa imangeleka. Otaku hokololwa kutya omukiintu nguka a li omuniilonga megumbo limwe lyi li momukunda Uukwiyu mOshitopolwa shaKahao okwa si mEtitano lya zi ko lwopotundi 13h00. Anuwa okwa yambukile komukunda Engela mOshitopolwa shaHangwena. 
Okwa itsuwa ishewe olutu lwomumati omugundjuka a konekwa nedhina Absalom Amukwa omunamimvo 34, ngoka a zile komukunda Okathitukeengombe mOshikandjohogololo Onesi. 

Otaku hokololwa kutya omulumentu nguka okwa ningi omasiku gaali kee wetike nokwa li a itsuwa momuti gu li menkolo a sa. 
Pahokololo lyopolisi omulumentu nguka okwa li a yongolwa mEtiyali lyomasiku 07 Juli, pethimbo kaali shiwike. MEtine, olutu lwe olwi itsuwa lwa endjelela komuti gu li mepya. Okwa itayelwa kutya omulumentu nguka okwa ikutha omwenyo ye mwene, na itaku fekelwa pu na uulingilingi washa.

Oshiningwanima shika osha ningilwa komukunda Okapa koRuacana hoka Amukwa a li a kutwa onga omuniilonga gwomegumbo.  Opolisi yOutapi oya patulula oshipotha shokuhinga nuuhasha moka aantu yatatu ayehe ya hupu, nonando ya mona iiponga. 
Otaku hokololwa oshiponga shika sha ningwa omutenya gwOsoondaha pomukunda Oluvango moshikandjohogololo shaAnamulenge, sho omuhingi a nyengwa okupangela osheenditho.Anuwa oshihauto shobaki, shonomola N10161UP, osha topa elola manga sha li kokapate komamanya, nomuhingi okwa nyengwa oku shi pangela e tashi ka idhenga momuti. 
Omuhingi naafaalelwa ye ayehe oye li li moonkalo tadhi nuwa omeya. 


2020-07-14  Staff Reporter

Tags: Khomas
Share on social media