New Era Newspaper

New Era Epaper
Icon Collap
...
Home / A taatawa meumbo kumwainamati eshi vati ta teya po ohombo yaye

A taatawa meumbo kumwainamati eshi vati ta teya po ohombo yaye

2022-05-12  Festus Hamalwa

A taatawa meumbo kumwainamati eshi vati ta teya po ohombo yaye
Top of a Page

“Otwa tewa meumbo nounona vange shaashi vati ohandi piyaaneke ohombo yamumwamememati. Mumwamememati omo e tu hanga meumbo omu eshi fyee omo twa kala hatu di nounona vange. Paife ohatu di meumbo lamushiinda shetu shaashi katu na apa hatu uka.”

Aa omatumbulo aRachel Hamutenya ta hokolola eshi a taatawa meumbo lavo kumumwainamati momwedi Apiilili neudo komukunda Onaame moshitukulwa shaHangwena.

Onda handuka eshi nda tewa meumbo lameekulu nda kala mo efimbo lile handi file meekulu oshisho ashike paife mumwamememati pamwe nameme, omumwaina wameme, ove likunda nokaana kaye opo va taataye nge meumbo lameekulu,” ta hokolola.

Omukainhu weedula 32 okwa kala meumbo nainakulu oule weedula 28 fiyo inakulu ta di mo konima eshi a ka kala a nyika ounghundi nokwa ka twalwa keumbo lokaana kaye komukunda u lili.

Pefimbo Kundana a talela po Hamutenya Omaandaxa keumbo oku ha di paife, okwa hokolola ta ti konima eshi inakulu a dja mo meumbo olo hava di, mumwainamati okwe uya nomukulukadi waye muDesemba omudo wa dja ko opo va kale hava di meumbo limwe navo.

Okwa hokolola ta ti petameko vati ova kala ngoo ve na ombili namumwaina noshoyo omukulukadi waye ashike eshi pa pita omafiku mumwaina okwa tameka okukala ha denge ounona vaye ta ti kutya nava dje mo meumbo laye.

“Mumwamememati okwa ya koomwene womukunda opo a ka lundululile edina leumbo li kale kedina laye. Okudja opo otwa tameka okukala ta ludile nge kutya vati onda pota, ame vati ohandi lombwele omukulukadi waye oupote kutya yee oku na ovakainhu vahapu,” ta hokolola.

Hamutenya okwa ti okwa hangika a lima noilya mepya, a kuna omakunde noikunomwa imwepo ya yooloka ashike meumbo okwa tewa eshi a fiya po noilya yaye kwa li a lima.

Okwa weda po ta ti mumwainamati okwa teta po omakunde noitila ei kwa li a kuna.

“Mumwameme okwa ya kopolifi opo a ka tulile nge mo eudafano lomukanda lokutaataa nge meumbo shaashi vati kave na ombili vali nomukulukadi waye,” ta hokolola.

Hamutenya okwa ti mumwaina okwe uya nopolifi ve na eembapila tadi ti kutya na dje mo meumbo olo, yee vati na kale kokule neumbo.

“Eshi opolifi ye uya oya fatululila nge eshi sha shangwa mombapila nokonima onda lombwelwa opo ndi londeke oinima yange aishe motuwa yopolifi opo ndi dje mo meumbo lovanhu,” Hamutenya ta hokolola.

Onghee oku dja opo onda londeka oinima yange pamwe nounona vange ve li vane ndele opolifi tai tu tula koshi yomuti u li pomunghulo wopate.

“Onda ya keumbo lomushiinda shange handi kwena nounona vange opo a kwafele nge ndi kale handi di meumbo laye manga, onghee mushiinda shange okwa itavela okupitika ndi dje meumbo laye omo paife handi di nounona vange ashike ohatu liteleke oikulya yetu vene nounona vange.

 

Hamutenya okwa ti okwa ninga onghendabala yokulopota oshikumungu eshi komhangu opo epangelo li kale la ya mo eenyala moshikumungu eshi.

Hamutenya okwa ti okwa li va ya komhangu kEenhana namumwaina oo, ashike ova lombwelwa komhangu kutya otai ningi omakonakono kombinga yoshikumungu osho manga.

“Omhangu oya lombwelange kutya otai ka ufana ovakwapata vetu opo va kundafane nghee oshikumungu eshi shi na okukala sha kandulwa po, opo ashike ndi dule okushuna keumbo lameekulu nounona vange,” ta hokolola.

Okwa weda po ta ti ota indile moshiwana opo shi mu yambidide noikulya, omakumbafa, oidjalomwa noshotu oipumbiwa ikwao ya yooloka.

Kwaau e na ehalo lokuyambidida Hamutenya na kwatafane naye 0812127574 ile kongodi ya mwene weumbo ou e mu idilila, 0814376404.

Pefimbo a ninga eenghundafana naKundana, Mwahafa Haitembu, ou vati a taataa mumwaina meumbo, okwa lombwela Kundana ta ti okwa yandja kwa li oshipambu shedu mepya kuHamutenya opo a ninge eumbo laye ashike vati okwa anya okudja mo meumbo.

“Onda ninga eenghendabala dokushivifila ovakwapata kutya Hamutenya onde mu pa oshipambu shedu mepya a ka ninge eumbo lavo lounona vaye ashike okwa anyena mo meumbo,” Haitembu ta ti.

Haitembu okwa ti okudja opo okwa ya kopolifi opo a ka tule mo eudafano lomukanda opo Hamutenya a kale a dja mo meumbo laye shaashi ota teya po ohombo yaye nombili pokati nokulukadi waye.

Kundana eshi a kwatafana namwene womukunda Onaame okwa hokolola ta ti oshiningwanima eshi okwe shi lopotelwa kwa laata nale konima eshi Hamutenya a taatawa mo meumbo, onghee okwa ti oshikumungu eshi oshi li momake omhangu.

Omakonakono omhangu otaa twikile moshikumungu eshi.

fhamalwa@nepc.com.na


2022-05-12  Festus Hamalwa

Share on social media
Bottom of a page