Omulumenhu weedula 46 okwa tetaula ohonda yaye nomakatana ndele te likufa omwenyo eshi e limangeleka Osoondaxa efimbo longula potundi 06h50 meumbo lavo komukunda Okathakiingondjo moshitukulwa shaShana.
Ohonda yaye yeedula 47 oi li moshipangelo shaShakati ko-ICU monghalo idjuu shaashi oya mona oshiponga komutwe nomoshipala eshi ya tataatetwa nomakatana.
Nakufya oye Silas Iyambo omanga omukainhu waye oye Ottilie Hangula ovakalimo vomomukunda Okathakiingondjo.
Opolifi moshitukulwa shaShana oya hokolola tai ti Iyambo okwa tameka okutanguna nohonda yaye Olomakaya efimbo lokonguloshi.
Vati Iyambo okwa lombwela ounona opo vaye monduda va ka nangale ndele ta ti inava lombwela omunhu nande kutya otava tanguna nohonda yaye.
Opolifi tai ti okudja opo ovadali ove lidilila monduda ndele tava tameke okutanguna mokule nokulidenga.
Ongula yOsoondaxa ounona ova penduka opo ka tale ngeenge ovadali vavo omo ngoo ve li monduda, eshi vati okaana koshiveli ka kala ke li ofika poshivelo shonduda yavo oka uda ondaka ya ina tai ufana pedu a fa e kwetiwe pofingo.
Eshi ounona va patulula po ponduda ova hanga xee e li meemhango monduda yavo yokunangala e limangeleka nongodi, omanga ina oku li mexungu lohonde noshipala shi na oipute eshi a tetwa.
Ounona ova lopotela ovashiinda nokonima ova shivifila opoliifi kombinga yoshikumungu eshi shaashi okwa li va tila nai. Omaandaxa Kundana okwa ya koshipangelo shaShakati oku ku na Hangula, ashike eendokotola oda ti omukainhu ita dulu okumonika shaashi oku li monghalo idjuu eshi ita dulu nokupopya ko-ICU.
Opolifi oya ti omukainhu inava hombola nomulumenhu waye ashike ova kala nokudja pamwe oule wefimbo lile.
Ovadali ava ove na ounona vatatu hava di navo meumbo limwe.
Hangula ina yandja ouyelele washa kopolifi kutya oshike ve lininga nomulumenhu waye shaashi ita dulu okupopya, omanga Iyambo ye ina fiya po omukanda washa tau yandje ouyelele kombinga yoshiponga.
Omudimba waIyambo owa twalwa koshipangelo shaShakati novakwapata vaye ova shiviifilwa efyo laye.
Omakonakono opolifi otaa twikile.