Omukainhu weedula 53 okwa holoka momhangulilo yaMangestalata mOndangwa, ta pangulilwa oshibofa shomahepeko omomaumbo nenyenyepeko lokolutu, eshi vati a tetaula okamona ka dalwa kumumwaina nekatana komaulu. 

MEtitatu, Johanna Uusiku okwa pewa e lifutile mo modolongo noN$1000.

Otaku hokololwa Uusiku oo e li omukalimo wokomukunda Ompembelonga moshitukulwa shaShikoto, a kufa ongodi ndele ta mange okamona keenyala adishe ndele ta kufa ekatana noku ka tetaula komaulu ayeshe.

Okaana vati oka mona oshiponga neenghono shaashi kaka li taka dulu okweenda. 

Omupopiliko wopolifi moshitukulwa shaShikoto Inspector Ellen Nehale okwa hokolola ta ti omukainhu ou vati okwa li ta fekele kutya okaana oko ke na omido 14 oka vaka po oshimaliwa shaye shoN$700, osho sha li monduda yaye yokunangala.

Ovaneumbo ova shivifila opolifi eshi va mona kutya okaana oka lemanekwa unene nokonima okaana oka twalwa koshipangelo opo ka mone epango lomeendelelo.

Opolifi oya ti okaana oko ihaka di meumbo looUsiku, ndele oka li ka ka talela po ina mumwaina waina (Uusiku) exulilo shivike olo. 

Otaku hokololwa kutya paife oke li monghalo i li xwepo ashike oka mangwa komaulu aeshe.

Oshimaliwa inashi monika natango, po kape na ouyelele kutya osha kufwa po kulyelye.

fhamalwa@nepc.com.na