Victoria Kaapanda

ONDALAE YAELIM-Oshipotha shaThomas Ashipala, 22, ngoka a tsu  Agustinus Kondjeni Tulyaameni ,18, nombele okupendukila Osoondaha yoshiwike sha zi ko  osha undulilwa momasiku 9 Mai nuumvo. Thomas okwa li a holoka lwotango mompangu yopevi yaShakati Omaandaha goshiwike shika.

Oshiningwanima shoka osha li sha holoka potundi 02:47 ongula yosOondaha, pehala lyokuninwa tapu ithanwa NK Bar momukunda Ondalae yaElim, moshikandjohogololo Elim moshitopolwa  shaMusati.
Otaku hokololwa kutya shoka sha etitha eso lyaTulyaameni sigo onena inashi tseyika nonando ya kala kaye na euvathano pokati kawo uule wethimbo, sho kwa li ya nyenyeta sigo Tulyaameni a tsu Ashipala sho ya kondjele lwoshikando shotango ashike ka li e shi lopota kopolisi.

Omugandjimulombo gwopolisi moshitopolwa shaMusati Anna Kunga okwa li a lombewle onzonkundaneki ndjino ta ti okwa lopotwa kutya Tulyaameni naAshipala oya li taya nwine pehala limwe mpoka ooyakwao ya ka mona ashike Tulyaameni a lala pondje omanga  Ashipala ta tilehi iitetene.

“Otashi vulika aalumentu mboka ye li yaali ya kala ya ikwatela onkone ndjoka ya ka tsikilitha olugodhi ndoka lwa faalele omwenyo gwa Tulyameeni,” Kunga ta ti ngaaka.
Tulyaameni okwa yambukile momukunda Ekamba moshikandjohogololo shaElim.  
Ashipala ka li a pulwa a tye sha kombinga yoshinima shika noshipotha she osha li sha undulilwa komeho, omanga opolisi tayi ningi omakonaakono.