Omulumenhu a longele ofitola yoFysal Fresh Produce okwa ponokelwa koolyamupombo ndele ta nyekwa oshimaliwa shi fike N$978000 Etitano potundi 10h50 yongula kOshikango, moshitukulwa shaHangwena. 

Omukonakoni woimbuluma Deputy Commissioner wopolifi moshitukulwa shaHangwena Zacharia Amakali okwa hokolola ta ti omulumenhu okwa li a ya kombaanga yoBank Windhoek yaShikango opo a ka tule oshimaliwa komavalulilo ombaanga yongeshefa yoFysal Fresh Produce.

Amakali okwa ti eshi ngoo omulumenhu a fika pombaanga, okwa kala a fikamifa otuwa yaye yoToyota Hilux GD6 komesho yombaanga omo ta ku hokololwa vati kutya motuwa okwa li muna oshimaliwa shongeshefa. Amakali okwa ti omanga omulumenhu ta di motuwa ekwete ondjato ei muna oshimaliwa, okwa dja ovalumenhu veli vatatu vahomata neembele neendjebo.

Okwa ti oku dja opo ovafekelwa ova twa omulumenhu nombele mepepe laye lokolulyo, ndele tava umbu ondjebo loikando ivali tava ti kutya ova hala ondjato yoimaliwa ei kwa li ili motuwa yaye.

Opolifi oya ti konima eshi omulumenhu a tuwa nombele ovafekelwa ove shipondola opo va nyeke ko ondjato yoimaliwa ndele tava faduka po. Amakali okwa popya ti efimbo loshiningwanima tashi longwa ovaameni vomaliko ava kwali tava longo efiku olo ova umba ovafekelwa oikando ivali, ashike omufekelwa umwe ou kwali ta shingi otuwa, naye okwa kufa ombistoli ndele taumbu omwaaameni vomaliko loikando ivali omanga kwa li eli kokule nonhele apa paningilwa oshimbuluma.

Opolifi oya ti ovafekelwa konima eshi vanyeka ko ondjato yoimaliwa ova nukila motuwa yavo yoPolo imbulau yonomola ina yi shiivika, ashike ota ku hokololwa kutya otuwa oina onomola yaWindhoek.

Konima eshi nakunyekwa oshimaliwa okwa twalwa koshipangelo shaNgela opo a ka mone epango lopaunamiti, omo paife eli a kwatelwa meembete.

Amakali okwa ti kapena omufekelwa a kwatwa po fiyo opapa, yee ta weda po ta ti kapena noshimaliwa sha monika mopaife onghee opolifi oye lipyakidila nokukonga ovafekelwa ava.