WINDHOEK- Ehuliloshiwike ndika lya ziko osho lya kundukidhwa kiipotha yoonkambadhala dhedhipago mbyoka ya ningwa koombinga dha yooloka moshilongo unene mokati kaagundjuka.
Opolisi yaNamibia momulombo gwopolisi gwehuliloshiwike oya lopota iipotha yi vulithe pwiitatu mbyoka yonkambadhala yedhipago mbyoka ya ningilwa moKhorixas , Omuthiya noshowo moKatutura moVenduka.
Oshipotha shotango osha ningwa mEtitano lwopotundi 23h45 sha ningilwa momulamba popepi nepandaanda lyaShanghai molukanda lwaKhomasdal. Opolisi oya hokolola kutya omulumentu gwomimvo 23 okwa yahwa nondjembo ndele ta kuthwa ongodhi ye yopeke noshowo omapando ge goongaku gedhina All-Star.
Okwa hokololwa kutya nakuyugwa iinima ye okwa li e li namukwawo taya kongo kuume kawo ngoka a adhika a nwa a kolwa e ta kala ke wetike pehala lyomanwino mpoka ya li ye li.
“Omanga nduno mboka taya taaguluka omulamba ngoka gwa tseyika nawa nedhina Arebush River Bridge ngoka gu li popepi noGammams Service Station, aalumentu yahamano ya homata omakatana noshowo ondjembo oye ya ponokele. Mbaka oya kambadhala okumatauka po ashike gumwe okwa yahwa omanga e li mondapo,” osho omulombo gwopolisi gwehuliloshiwike gwa hokolola ngaaka.
Okwa hokololwa kutya nguka nduno okwa li a falwa koshipangelo nonkalo ye otayi hokololwa yi li hwepo notayi nuwa omeya. Iinima mbyoka ya yugwa oya hokololwa yi li mongushu yiimaliwa N$1800 na kapu na shoka sha monika po nenge woo ngoka a mangwa moshinima shoka.
Oshiningwanima oshikwawo ooshoka sha ningwa mOlyomakaya sho omulumentu gwomimvo 24 a li a adhika metenke lyombinzi komeho gegumbo. Nguka okwa li a falwa koshipangelo noambulansa opo a ka pangwe . Kap una ngoka a mangwa moshinima shika nopolisi otayi indile kehe ngoka e na uuyelele wothaathaa tawu etitha opo pu kale pwa mangwa mboka ya longo oshikulumuna shoka ye wu gandja kopolisi meendelelo ngaashi tashi vulika.
KOmuthiya mOlyomakaya okwa hokololwa kutya omunandholongo popolisi yaMuthiya okwa tsu mukwawo nosikulufu mothingo nomatompelo kage shiwike.
Mboka yaali oye na iipotha ya yooloka yokuyaka noshowo okumonithathana iiponga komalutu omanga nakutsuwa e na oshipotha shokuteya omagumbo nuulunga.
Nakutsuwa okwa falwa koshipangelo kOmuthiya nkonima okwa li a falwa koshipangelo kOnandjokwe oshoka okwa li a ehamekwa noonkondo adhihe ashike ngashiingeyi oku li ngaa monkalo ohwepo. Osikulufu oya monika noya kuthwa ko. Omutamanekwa okwa tegelwa okuholoka mompangu oshiwike shika, nomakonaakono gopolisi otaga tsikile moshinima shika.