ONGWEDIVA - Aanangeshefa yAachiina mOndangwa  oya gandja iikulya kelelo lyondoolopa yaNdangwa, omagano ngaka oga nuninwa aakwashigwana mboka ye li unene mompumbwe  moshitopolwa shaNdangwa.
Iikulya ayihe kumwe oyongushu N$40 000, moka mu na omagadhi gokulya, uusila, oosuka oshowo omakoloni.
Omukalelipo mehangano lyAachina mOndangwa Jiang Bo okwa ti iikulya mbyoka oya nuninwa omagumbo ge li 150 gaakokele ngoka ge li unene mompumbwe noga kanitha iiyemo omolwa Covid-19.

“Egandjo ndika lyiikulya kaakwashigwana yomOndangwa, okugandja oshiholelwa oshiwanawa shukuume pokati kaChiina noshigwana omolwonkalo nuupyakadhi womukithi nguka gwa iteyela moshigwana,” Bo ta ti ngaaka.
Okwa gwedha po ta ti nonande oongeshefa otadhi ende tadhi shongola pethimbo ndika lyomukithi gwoCovid-19, oye na okukondja nokukwathela mpoka taya vulu, oshoka ope na mboka itaaya vulu nando nando omolwa ekanitho lyiiyemo.
Bo okwa gwedha po ta ti oye na omukumo nehalo lyokukwathela oshoka Namibia egumbo lyawo etiyali, noye li onga omuntu namumwayina.
Okwa tseyitha kutya iikulya mbika okwa li ya landwa niimaliwa ya gwandjwa kukehe Omuchina e li mOndangwa, omolwonkalo ya li ya mono tayi dhengele kwaamboka ya shunithwa monima  komukithi ngoka.

Bo okwa gwedhap o ta ti egandjo ndika inali hulila ashike mOndangwa, ashike otaya tsikile okugandja iikulya moondoolopa dha yooloka, ta ti oshiwike tashi ya oya uka kOshakati nOngwediva.
Ngoloneya gwoshitopolwa shaShana Elia Irimari okwa ti shika oshikando oshitiyali momwedhi muka ta tambula iikulya yaamboka ya kanitha iiyemo omolwomkithi gwoCovid-19, sho omagumbo ge li 200 ga li natango ga topolelwa iikulya komunageshefa gumwe gomOndangwa.
“Shika otashi ulike nkene Aachina ye na olukeno naakwashigwana. Ta ti shoka ya gandja moshigwana oshiningwanima oshinene nosha simana oshoka aantu mboka oyo haya sapota oongeshefa dhawo,” Irimari a popi ngaaka.
Okwa gwedha po nekumagidho ta ti, shika inashi hulila mpaka ihe nash ikale oshiholelwa sha kehe gumwe, a vule okuya mondjato nokuyambidhidha naashoka ta vulu.
Oshigwana osha pumbwa omakwatho ogendji, unene ethimbo ndika lyomukithi nguka.