New Era Newspaper

Icon Collap
...
Home / Aafuthi ya pimbile mokuyuga oshigwana mOshana

Aafuthi ya pimbile mokuyuga oshigwana mOshana

2021-12-02  Victoria Kaapanda

Aafuthi ya pimbile mokuyuga oshigwana mOshana
Top of a Page

Victoria Kaapanda

Aakalimo pamwe nopolisi moshitopolwa shaShana oya taalela omaupyakandhi giimbuluma, mbyoka tayi ende tayi indjipala, noya pimbila ethimbo ndika lyuuka kehulilo lyomumvo.

Omupopiliko gwopolisi moshitopolwa shaShana Thomas Aiyambo okwa ti iimbuluma oya indjipala, aafuthi otaya longitha ompito kehe okuyuga aakwashigwana iimaliwa yawo, iihauto oshowo okuteya omagumbo.

“Onda kala nokukumagidha oshigwana shi hulithe po okunana iimaliwa koomuma. Uuna gumwe a hala okulanda na kambadhale okulongitha uumbomba pamukalo gwoshinanena,” ta kumagidha ngaaka. Ta ti, okwa li wo a kumagidha oshigwana shi kale tashi ningi omaindilo kopolisi, opo yi kale tayi thindikile oshigwana uuna taya ka nana iimaliwa oyindji.

Aiyambo ta ti, ndika olyo ethimbo ookalyamupombo taya longo ya itula mo onkene oshigwana inashi pumbwa okukala sha kotha tashi mbonyoka. “Onda kala nokupopya iiningwanima tayi longwa kaafuthi miikundaneki ya yooloka oshowo okukumagidha oshigwana nkene shi na okwiihumbata, ihe natango otatu lopotelwa iiningwanima yoludhi ndoka,” Aiyambo ta ti ngaaka.

Ta ti, mehuliloshiwike moshitopolwa shaShana aafuthi oya yugu nokumatuka po niimaliwa oshowo iinima yongushu yi vule N$60 000.

Omunamimvo 43 okwa li a nana oshimaliwa N$28 700 mombaanga onene yaBank Windhoek mOngwediva, mpoka anuwa a zi, ee ta hingi sigo opongeleka yaRoman Catholic.

“Omulumentu ngoka okwa li a kutha N$850 piimaliwa mbyoka  a nana, sho a ka futa osikola yokanona ke,”ta ti ngaaka. Otaku hokololwa kutya sho a galuka mohauto ye, mpoka a li a thigi iimaliwa ye ina adha po sha. 

Ta ti, omulumentu ngoka okwa hokolola kutya kakwa li a kala mo ethimbo ele mosikola. Aiyambo okwa ti natango omukiintu gumwe okwa li a ponekelwa mondingosho kaafuthi momukunda Oikango molukanda Eehama mOngwediva.

Otaku hokololwa kutya iimaliwa mbyoka inayi shiwika natango kutya ingapi ya yiwa nayo ontuku kaafuthi. Etitano lya zi ko ositola yiikulya Hungry lion oya ponokelwa kaafuthi nokuya ontuku noshimaliwa shi thike poN$7 500.

Opolisi yaShana otayi kumagidha oshigwana shi longele kumwe nopolisi okumanga aafuthi mboka oshowo okulopota mbala una sha mono iilonga yi li ngaaka tayi holoka.

Tayi ti aantu mboka oya pumbwa okumangwa opo ya ze mo mokati moshigwana. 


2021-12-02  Victoria Kaapanda

Share on social media
Bottom of a page