Opolisi moshitopolwa shaShana oyi li molukongo lwaafuthi ye li yane mboka ya yugu omukuluntu gwoombaanga dhoNampost mOndangwa iimaliwa yi thike poN$600 000 mOmaandaha.
Omupoliko gwopolisi moshitopolwa shaShana, Thomas Aiyambo okwa ti oshiningwanima shoka osha holoka moshanga shomutenya lwopotundi 13h00 mepandaanda lyaBismarck popepi nokapale kotennis, mOndangwa. “Omulumentu ngoka oye omukuluntu gwoombaanga adhihe dhoNampost mOndangwa, okwa li a nana N$100 000 ongula yOmaandaha mombaanga onene yaStandard kOluno nelalakano lyoku yi topolela iitayi yoombaanga oonshona mondoolopa yaNdangwa,” Aiyambo  ta ti ngaaka. Ta ti, anuwa okwa li a pewa ko tango N$400 000 po08h45 mbyoka a li a tameke  okutopolela oombanga dhimwe ooshona. Otaku hokololwa kutya, po12h25 okwali a dhengelwa kombaanga yoStandard okwa tale ko N$600 000 ndjoka a li a hupitha ko. Aiyambo ta ti, omulumentu ngoka gwomimvo 58, okwa li ta hingi ohauto yawo yiilonga obaki yi na oshihako shoNampost. 

Anuwa okwa li a ka tala ko iimaliwa mbyoka, nokw ali e yi adha ya longekidhwa nale ya tulwa mepakate, e te yi tumbile mohauto e li oye awike. “Okwa li a hingi, a tsikile ngeno oku ka topola iimaliwa mbyoka a pewa hugunina oshoka N$400,000 oya adhika ya pwa po. 
Sho a li a thiki pokapale kotennis okwa li a ponekelwa kaalumentu yane, ya homata oondjembo omanga yaali ye na omamanya,” Aiyambo a popi ngaaka. Ta hokolola ta ti, oya li ya dhenge mo omakende goomweelo gohauto agehe, e taya kutha mo epakate ndyoka lyi na iimaliwa yi thike poN$600 000. Ta ti, oya matukapo nohauto yoToyota Corolla ontokele yonomola N 4015 G.  Aiyambo okwa ti nakuningilwa omuyonena anuwa ita dhimbulukwa po nando ogumwe, nonande okwe ya tsakanene. Opolisi oya ti aluhe otayi gandja omakumagidho aakwashigwana kaaya ende niimaliwa oyendji komalutu kaaye li  naakeeleli. “Iimaliwa ngaashi yi thike mpoka inayi pumbwa okuumbatwa komuntu gumwe koomuma. Naya kale haya kutha oomahangano gaakeeleli yomaliko, ogo ga kale taga mbaanga iimaliwa nenge ya kale taya thindikilwa,” opolisi  ya kumagidha. Tayi kumagidha oshigwana kutya nashi kale aluhe shi na oongodhi dhopolisi dhomeendelelo dhomomudhingoloko gwawo.
Natango oya kumagidha oshigwana shi kale aluhe sha kotoka kehe mpoka tashi ende, nongele pwa holoka omayinyengo kaage li nawa shi lopotele opolisi kuyele.