Osikola Eenhana Secondary School moshitopolwa shaHangwena oya li ya ponokelwa kookalyamupombo Olyomakaya ga zi ko, nokuya ontuku nookompiyuta dhopeke dhongushu yi vule N$62 000.
Sha ikolela kuSergeant Andrew Nghiyolwa oshiningwanima shoka otashi tengenekwa sha holoka ethimbo lyuusiku.
Ta ti ookompiyuta dhopeke dhi li 15, oonduudhe molwaalwa nomonita yimwe, oya yiwa nayo kaafuthi, ihe kape na nando oyimwe ya monika po.
“Otatu indile moshigwana shi longele kumwe nopolisi opo shi lopote uuna sha mono ookompiuta ndhoka tadhi landithwa momapandaanda nenge pe na ngoka e dhi na,’’ ta indile ngaaka.
Opolisi inayi yelitha ngele posikola mpoka opwa li pe na omukeeleli gwomaliko nenge ihapu kala nando.
Nghiyolwa okwa ti, oya ndhindhilike etoyo lyomagumbo tali indjipala moshitopolwa shaHangwena, unene ethimbo ndika aalongi ya yi komafudho.
Ta ti, okuza muJanuali nuumvo sigo
onena omagumbo ge li 132 oga yugwa kaafuthi.
“Pethimbo ndika aafuthi otaya teyagula omagumbo konima ya ndhindhilike kutya omagumbo kage na aantu, unene aalongi mboka ya yi komafudho,” ta popi ngaaka.
Ohashi kala shi li nawa uuna aashiinda ye na elongelokumwe, oku ikalela po uuna gumwe ke po, nuuna pe na sha tashi holoka omushiinda ote shi tseya.
Ta gwedha po ta ti, oya kala taya lopotelwa omagumbo taga teyagulwa kaafuthi okuza petameko lyefudho lyosikola.
Nghiyolwa moonkundathana noshifokundaneki shika okwa kumagidha wo oshigwana shi kale tashi gongala kiigongi
tayi holoka moshitopolwa, okumona omalongo.
“Otandi popi nda ukilila unene ootate mboka haya longele oomeme omiyonena, ya kale taya gongala kiigongi opo ya tseya shoka shi li mondjila oshowo oku ikaleka kokule nomahepeko goomeme oshowo iimbuluma yilwe,” ta kumagidha ngaaka.
Opolisi oya indile oshigwana shi kale aluhe shi li mekwatathano ewanawa oshowo tashi longele kumwe nopolisi okuyanda iimbuluma yi holoke.
Ongula yEtiyali opolisi moshitopolwa shaShana natango oya kumagidha oshigwana shi kale tashi thigi aantu momagumbo oshoka aafuthi otaya ponokele omagumbo.
“Aafuthi otaya ende taya tala omagumbo ngoka kaage na aantu nokuyuga mo iinima. Aafuthi ooya ndhindhilikwa taya ponokele omagumbo unene ethimbo lyomutenya omanga aantu ya ya kiilonga,” tayi kumagidha ngaaka. – vkaapanda@nepc.com.na