New Era Newspaper

New Era Epaper
Icon Collap
...
Home / Aagundjuka moGrootfontein otaya nyangele aanona ye  li momapandaanda 

Aagundjuka moGrootfontein otaya nyangele aanona ye  li momapandaanda 

2021-05-11  Victoria Immanuel

Aagundjuka moGrootfontein otaya nyangele aanona ye  li momapandaanda 

Ethimbo lyuutalala olya thika, ihe natango ope na mboka taya lala momapandaanda oshowo momahala ga eguluka oshoka kaye na omahala gwokuza.

Omuhwahwameki gwongundu Affirmative Repositioning (AR) Johannes John okwa ti, omwenyo gwe ogwa li gwa ende sho a tala aakalimo yomomudhingoloko gwaGroetfontein, taya lala momahala ga andjalala, omanga ku na uutalala, unene ethimbo lyuusiku.

“Otandi indile moshigwana, kaanamutimahenda opo kehe ngoka e na iikutu, omakumbatha oshowo oongaku inoo dhi pumbwa we, mu dhi gandje kaamwameme mboka taya mono iihuna,” ta pula. John okwa indile ngoka e na ehala okuyambidhidha aantu mboka, a dhenge konomola ye yopeke 081 662 0755 nenge ya fale shoka taya kwathele nasho kombelewa yakansela moshikandjohogololo shaGrootfontein. “Otandi ka pandula peha lyawo, kukehe ngoka te ke shi ninga, Pamba na tule natango mpoka tapu zi,” a popi ngaaka. Iitopolwa oyindji moNamibia oyi na aantu, unene aanona taya lala momapandaanda oshoka kaaye na omahala mpoka taya zi. Eliazer Shihepo omunapolitika oshowo omuhwahwameki okwa ti, pethimbo ndika kakwa li ku na okukala ku na uunona tawu li momandoloma nenge tawu lala momapandaanda.

“Natango otwa fa tu li methimbo lyuukoloni. Aantu mboka ye li momapandaanda hasho ya hala ihe omolwomatompelo gonkalo ga yooloka, onkene oya pumbwa okusilwa oshimpwiyu kepangelo,” ta popi ngaaka.

Ta ti, omaupyakadhi ga tya ngaaka oto ga adha unene miitopolwa yokuuzilo, nonando konooli otaga yalulwa.

Shihepo ta popi ta ti, aanona yamwe oya kanitha aakuluntu yawo, yamwe momagumbo oya za mo kondjala, yamwe kaye shi mpoka pe na aakuluntu yawo, agehe ngoka omaupyakadhi. “Uuministeli wuukakwashikekookantu nuuthemba womuntu owa li wa pumbwa okukala wa kwashilipaleka kutya kape na omuntu ta lala momapandaanda nenge ta li momandoloma nena,” Shihepo ta ti ngaaka. Ta gwedha po ta ti, ohashi nkundilipaleke omutima gwe, aluhe okutala uunona mboka tau lala kohi yoontopa, wa ninga omapakete ogo iinguma yawo. “Aanona mboka osikola kaye yi shi, nonando otaku popiwa kutya, okanona Okanamibia kehe, oka mangulukila elongo, kape na okanona ke na okukala kaake li mosikola,”  a popi ngaaka.

Hugunina okwa ti, uupyakadhi wu li ngaaka nawu hulithwe po moNamibia.


2021-05-11  Victoria Immanuel

Share on social media