Aanyasha ye li 169 oya ndhindhilikwa kaaye na noye li mompumbwe yiilonga moshikandjohogololo shOngenga moshitopolwa shaHangwena.
Ndhoka odha popiwa kukansela gwoshikandjohogololo shOngenga Mathew Shikongo.
Ta ti, aanyasha mboka okwali ya ndhindhilikwa konima yali ya ningi iigongi momikunda adhihe, okuza omuvo gwayi, muMalitsa.
“Uupyakandhi mboka owa kuutumbika aanyasha oyendji momagumbo, mwakwatelwa mboka yena oonzapo okuza kiiputundhilo yopombanda,” ta fatulula ngaaka.
Ta ti, oya ningi omakwatathano nuuministeli womandiki ga yooloka mboka tau vulu okugandja oompito dhiilonga kaanyasha, mboka ya
ishangitha.
“Ethimbo twakala ta tu ningi iigongi, otwakala wo natango nokukumagidha aanyasha ya iishangithe kuuministeli wiilonga, nuuna pweya oompito ndhiilonga ya tothwa mo,” ta popi ngaaka.
Shikongo okwagwedhapo ta ti, omumvo nguka otaya ka ndhindhilika aanyasha mboka yena oonzapo, ihe kayena oshimaliwa sho kutameka oongeshefa, tadhi vulu okugandja natango iilonga moshigwana.
“Otwa ninga nale omakwatathano nkene tuna okushi enda, opo tukwathele aanyasha mboka yena oonzapo. Otwategelela ashike omayamukulo gahugunina okuza koombelewa dhopombanda,”ta popi ngaaka.
Kansela monkundathana naKundana okwati, oyandhindhilike aanulema yeli momagumbo taya mono iihuna, noyendji oya taalela onkalo yoluhepo.
“Aanulema yathika 250 moshikandjohogololo shOngenga oya pumbwa omakwatho,” ta ti ngaaka.
Ta gwedhapo ta ti, oya tsakaneke aanulema yeli monkalo tayi yemateke.
“Aanulema yamwe oyena uunkundi unene, itaaya vulu okweenda omanga yamwe taya ikoko,” ta hokolola ngaaka.
Ta ti, aanona yamwe yena uulema oyeli ashike momagumbo oshoka keyena shoka tashi yathikitha koosikola.
“Okwali twa ningi omaindilo moshigwana, kaasanamutimahenda opo ya kwathele mboka yeli lela monkalo ondhigu,’ ta popi ngaaka.
Shikongo okwati, aanulema yeli 25 oya mono omakwatho guutemba, nonando kaushi upeepeka.
Kansela ota indile moshigwana ku kehe ngoka ena ohokwe yoku yambindhindha aantu mboka , eshi ninge ashike.
“Ngele opena ngoka ena okatemba megumbo ihaaka longithwa, netu tseyithile opo tu vule okukakwathela mboka yeli lela mompumbwe,” ta indile.
– vkaapnda@nepc.com.na